ناڤەندا نووچەیان – سەما
ئەنجوومەنێ ئێزدیێن سووریێ ڕادگه‌هينت، دوهى ڕۆژا ئينيێ 3-1-2025ێ، شاندەکێ فەرمی یێ ئەنجوومەنى گەهشتیە دیمەشقێ پايته‌ختێ سووريێ و دێ گه‌نگه‌شێ ل سه‌ر دۆزه‌يێن ئێزديان كه‌ن.
شاندێ ئەنجوومەنێ ئێزدیێن سووریا پێكهاتييه ژ خانم مزکین یوسف، سەرۆکا ئەنجوومەنێ ئێزدیێن سوریا، سه‌رحان عیسا، په‌يڤدارێ فەرمی یێ شاندی، ناسر حەسەن، نوونەرێ ئەنجوومەنى ل دەڤەرا عەفرینێ، جەمیل جەعفەر، نوونەرێ عەفرینێ.
ئيرۆ شه‌مبوويێ 4ى كانوونا ئێكێ 2025ێ، ئەنجوومەنێ ئێزدیێن سووریێ د راگه‌هاندنه‌كێ دا دياركر، شاند دێ زنجیرەکا هەڤدیتنان دگەل کەسایەتیێن گرنگ د ئیدارا نوو دا ئەنجام دەن و دێ ره‌وشا ئێزديان گەنگەشە كه‌ن ئەوێن کو دەمەکێ درێژ ژ نەخۆشیێن شەڕی و بارودۆخێن ئاوارەبوون و پەراوێزکرنێ ئێشیاین، ژبلی وان ئاستەنگێن کو د سەردەمێ رژێما بەرێ و سالێن شەڕی دا ڕاستی وان هاتین و کارتێکرنەکا مەزن ل سەر دەڤەرێن وان و هەبوونا وان یا دیرۆکی کری.
ئەنجوومەنى ئاماژە ب وێ چەندێ دا، ئارمانجا ڤان هەڤدیتنان گەڕیان ل دووڤ چارەسەریێن کرداری و هەردەم ژ بۆ پاراستنا مافێن ئێزدیان، و دەستەبەرکرنا ڤەگەریانا وان یا ب رێز بۆ دەڤەرێن وان یێن دیرۆکی، و بهێزکرنا رۆلێ وان د پێشەرۆژا وەلاتی دا یە، هەروەسا دێ د هەمان گەڕێ دا هەڤدیتنێن وان دگەل گەلەک پێکهاتەیێن نەتەوەیی یێن سووریێ هەبن، د گاڤەکێ دا کو ئارمانجا وێ بهێزکرنا دیالۆگ و هەڤکاریا هەڤپشک یە د ناڤبەرا هەموو ته‌خ و چينێن جڤاکا سووری دا.
هه‌روه‌سا دوپاتكر، ناڤه‌ڕۆكا هەڤدیتنان و ئەنجامێن کو دێ گەهنێ د دەمەکێ پاشتر دا دێ بەلاڤ کەن.
بۆ زانين ئێزدیێن سووریێ، وەک هەر پێکهاتەیێن دی، د سالێن شەڕی دا ئێش و ئازارێن مەزن دیتن، و ڕاگوهاستنا ب زۆری و کاڤلکرنا دەڤەر و گوندێن خۆ دیتن، ژبلی وان ئاستەنگێن کو ڕاستی ناسناما وان یا چاندی و ئۆلی هاتین.