ناڤەندا نووچەیان – سەما
رێڤەبەرێ فه‌رمانگه‌ها ژێدەرێن ئاڤێ ل ناحيا باشيكێ راگه‌هاند، ده‌ست ب دروستكرنا هه‌ژماره‌كا سكرێن بچووك دێ ئێته كرن و چێکرنا وان سكران بۆ کۆمکرنا ئاڤێیه و دێ چەندین مفا ھەبن.
جيهاد عومه‌ر، رێڤەبەرێ فه‌رمانگه‌ها ژێدەرێن ئاڤێ ل ناحيا باشيكێ، ئيرۆ پێنج شه‌مبوويێ، 9ى كانوونا ئێكێ 2025ێ، بۆ سه‌ما گۆت:” پشتى ره‌زامه‌ندى ل سه‌ر دروستكرنا 2 سكرێن بچووك هاتيه وه‌رگرتن، نوكه ل گه‌ليێ به‌حزانێ و باشيكێ ده‌ست ب دروستكرنا سكران هاتيه كرن و دقۆناغا بجهئينانێ دانه، چێکرنا وان سكران بۆ کۆمکرنا ئاڤێیه و دێ چەندین مفا ھەبن، ژ وانژی دێ کاریگەری ل سەر ئاڤا بن ئەرد ھەبت”.
جيهاد عومه‌ر گۆتژى:” بۆ گرنگيدان و عمباركرنا ئاڤێ بۆ ده‌مێن پێدڤى، دپلان دايه سێ سكرێن دى ژى بێنه دروستكرن، بۆ وێ چه‌ندێ ل ده‌مێ پێدڤى مفا لێ بێته وه‌رگرتن بۆ كه‌رتێ چاندنێ”.
رێڤەبەرێ فه‌رمانگه‌ها ژێدەرێن ئاڤێ ئاشكراكر: “پلان و بەرنامێ فه‌رمانگه‌هێ ئەوە مفا ژ گشت ژێدەرێن ئاڤێ ل ده‌ڤه‌رێ بێتە وەرگرتن”.
ناڤبرى ديارژى كر، وه‌كو فه‌رمانگه‌هـ دبزاڤێن به‌رده‌وامدایه بۆ دابینكرنا ئاسایشا ئاڤێ و زێده‌كرنا ئاڤا ل ژێر ئه‌ردى.