ناڤەندا نووچەیان – سەما
راوێژكاره‌كێ جڤاتا روحانى يا ئێزديان دبێژت:”ئێزدى دێ یاداشتنامه‌یه‌كێ ب هه‌ماهه‌نگی دگه‌ل حكومه‌تا هه‌رێما كوردستانێ پێشكێشى حكومه‌تا نوو يا سووريێ و يوئێن كه‌ن”.
ل رێككه‌فتى 11-1-2025، جڤاتا روحانى يا بلند يا ئێزديان كۆمبوونا خۆ يا ئاسايى ب سه‌رپه‌رشتيا مير حازم ته‌حسين به‌گ، ميرێ ئێزديان ئه‌نجامدا و چه‌ند بريار بۆ خزمه‌تكرنا جڤاكا ئێزديان ده‌ركرن.
خالد نه‌رمۆ، راوێژكارێ جڤاتا روحانى يا بلند يا ئێزديان، ئيرۆ 11ى كانوونا دووێ 2025ێ، بۆ سه‌ما گۆت: “ژبه‌ر گوهۆڕینێن ڤێ داویێ و كاركرن بۆ دروستكرنا حكومه‌ته‌كا ئینتقالی ل دیمه‌شقێ و پێشهاتێن نوو ل وێ ده‌ڤه‌رێ، جڤاتا روحانى بریاردا به‌یاننامه‌یه‌كێ بۆ پشته‌ڤانى یا ئێزدییێن سووریێ ده‌ربێختن، داخوازی و پێشنیارێن وان بۆ سوریایا نوو د به‌یاننامێ دا بێنه نڤیسین و ل نێزیك دێ ئێته به‌لاڤكرن”.
ئاشكراكر: ” ليژنه‌يه‌ك بۆ دووڤچوونا ره‌وشا ئێزديێن سووريێ ب سه‌رۆكاتیا میرێ ئێزدیان دێ ئێته پێكئينان و دێ ل گه‌ل كه‌سايه‌تيێن ئێزديێن سووريێ راوێژێ كه‌ن بۆ به‌رهه‌ڤكرنا ياداشتنامه‌يه‌كێ كو بگه‌هيننه لايه‌نێن به‌رپرس ل حكومه‌تێ و لايه‌نێن ده‌ستهه‌لات ب ده‌ست وه‌كو هه‌سه‌دێ ل ده‌ڤه‌رێن ئێزدينشين و لايه‌نێن ديتر و كونسولخانه‌يان و سازيێن نێڤ ده‌وله‌تى ل هه‌رێما كوردستانێ، بۆ چه‌سپاندنا مافێ ئێزديا وه‌كو كه‌مينه‌يا ئاينى و مافێ ئاين وه‌لاتيبوونێ ل وى وه‌لاتى”.
هه‌روه‌سا راگه‌هاند: “ئه‌ڤ هه‌موو كار ب هه‌ماهه‌نگى ل گه‌ل حكومه‌تا هه‌رێما كوردستانێ دئێنه كرن، ژبه‌ركو حكومه‌تا هه‌رێمێ وه‌كو سازيه‌كا فه‌ر‌مى دچارچووڤێ عيراقێ دا ژلايێ دبلۆماسى ڤه پشته‌ڤانى يا ئێزديان دكه‌ت”.