ناڤەندا نووچەیان – سەما
په‌رله‌مانتاره‌كا ئێزدى ل ئه‌نجوومه‌نێ نوونه‌رێن عيراقێ دخوازيت په‌رله‌مانێ عيراقێ له‌زێ ل خواندنا ئێكێ بۆ پرۆژه ياسايا جينۆسايدا ئێزديان بكه‌ت و مافێ قوربانيان بێنه به‌رجه‌ستكرن.
ڤيان ده‌خيل، په‌رله‌مانتارا ئێزدى ل ئه‌نجوومه‌نێ نوونه‌رێن عيراقێ ل سه‌ر فراكسيۆنا پارتى ديموكراتى كوردستان راگه‌هاند: به‌رى ماوه‌يه‌كى په‌رله‌مانتارێن ئێزدى ل په‌رله‌مانێ عيراقێ پرۆژه ياسايا دانپێدانا جينۆسايدا ئێزديان پێشكێشى په‌رله‌مانى كر و دخوازين له‌ز ل خواندنا ئێكێ بۆ پرۆژه‌ى بێته كرن.
هه‌روه‌سا ئاماژه ب وێ چه‌ندێ دا، ئه‌و تاوانێن تيرۆرستێن داعشێ ل ته‌باخا 2014ێ ل دژى ئێزديان ئه‌نجامداين، بگره ژ كوشتنا ب كۆم و ره‌ڤاندنا كچ و ژنان و ده‌ربه‌رده‌ركرنا ب زۆره‌ملێ ل دووڤ هه‌موو پيڤه‌رێن نێڤده‌وله‌تى تاوانێن كۆمكوژيێ و ل دژى مرۆڤايه‌تيێ نه.
ڤيان ده‌خيل، گۆتژى: “پێدڤيه حكومه‌تا عيراقێ يا پابه‌ند بت و دادمه‌ندى و مافێ قوربانيان ل به‌رچاڤ وه‌رگرت و ل سه‌ر ڤى پرۆژه ياسايێ درژدين هه‌تا په‌رله‌مانێ عيراقێ دانپێدانێ ب جينۆسايدێ دكه‌ت”.
ل 3ى ته‌باخا2014ێ، رێكخراوا داعش هێرشه‌كا درندانه بۆ سه‌ر شنگالێ ئه‌نجامدا و تاوانێن ل دژى مرۆڤايه‌تيێ ده‌رهه‌قێ ئێزديان ئه‌نجامدان.
دهێرشێ دا پتر ژ هه‌زار وه‌لاتيێن بێ گونه‌هـ هاتنه كوشتن و 4617كچ و ژن و زه‌لام و زارۆك هاتنه ره‌ڤاندن و هێشتا چاره‌نڤيسێ پترى 2 هه‌زار كه‌سان يێ ديار نينه.
ل سه‌ر ئاستێ جيهانێ تا نوكه نێزيكى 20 ده‌سته و وه‌لاتان كه‌يسا ئێزديان وه‌كو جينۆسايد ناسانديه.
