ناڤەندا نووچەیان – سەما
وەزارەتا ساخلەمیا عیراقێ پترى 6 هه‌زار دەرچوویێن پشکێن ساخلەمیێ دامەزراندن و ئێک ب تنێ ژی ل دەڤەرێن مادا 140 نەهاتە دامەزراندن.
ل دووڤ نڤيسارەکا وەزارەتا ساخلەمیێ یا حکومەتا عیراقێ، کو ل ڕۆژا 14/1/2025 دەرچوویە، بڕیار هاتیەدان کو 6305 دەرچوویێن پشکێن ساخلەمیێ ل کولیژ و پەیمانگەهان بێنە دامەزراندن.
د. ماجد شنگالی، سەرۆكێ لژنا ساخلەمیێ ل په‌رله‌مانێ عیراقێ، ئيرۆ 15ى كانوونا دووێ 2025ێ، بۆ سەما راگەهاند: وەزارەتا ساخلەمیا عیراقێ 6305 دەرچوویێن زانكۆ و پەیمانگەهان دامەزراندن، لێ ئێك ژی ژ خەلكێ شنگالێ و مادێ 140 نەهاتیە دامەزراندن، مافێ خەلكێ شنگالێ یە كو بێنە دامەزراندن، چنكو شنگال ژ ئالیێ ئیداری ڤە سەر ب عیراقێ ڤەیە.
سەرۆكێ لژنا ساخلەمیێ ل په‌رله‌مانێ عیراقێ دوپاتكر، د چەند رۆژێن بێت دا دێ كۆمبوونەكێ ل گەل د. صالح مه‌هدی حسناوی، وەزیرێ ساخلەمیا عیراقێ ئەنجام دەین و دێ پرسیارا ئەگەرێن نەدامەزراندنا خەلكێ مادێ 140 ب تایبەت خەلكێ شنگالێ ژێ كەین و پشتی هنگی دێ ئەنجامان بۆ رایا گشتی دەینە دیاركرن.
هه‌ژمارەکا مەزن یا ئاکنجیێن دەڤەرێن کوردستانی یێن دەرڤەی ئیدارا هەرێما کوردستانێ دەرچوویێن پشکێن ساخلەمیێ نە ل کولیژ و پەیمانگەهێن هەرێما کوردستانێ و عیراقێ، لێ چ کەسەک ژوان نەهاتنە دامەزراندن و هاتنە بێبەهرکرن.
