ناڤەندا نووچەیان – سەما
ئيڕۆ پێنج شەمبوويێ، 23-01-2025، مەسرور بارزانی، سەرۆكێ حكوومەتا هەرێمێ كوردستانێ، ل داڤۆس، ل گەڵ ئەسعەد شەیبانی، وەزیرێ دەرڤەیێ سووریا كۆمبوو.
حكومەتا هەرێمێ كوردستانێ د ڕاگەهاندنەكێدا ئاماژه ب وێ چه‌ندێ دا “د كۆمبوونەكا دۆستانه‌دا، بارودۆخێ گشتیێ سووریا و پێشڤه‌برنا پەیوەندیێن دوولاينه و داوى گوهۆڕێن ده‌ڤه‌رێ هاتنه به‌حسكرن”.
ب گۆڕەی ڕاگەهاندنێ “وەزیرێ دەرڤەیێ سووریا، كورتەیەك دەربارەی بارودۆخێ نوویێ سووریا و بزاڤێن ئیدارەیا نوو بۆ ڤەگەڕاندنا ئارامیێ و سەقامگیریێ و دابینكرنا خزمەتگۆزاریێن گشتی بۆ وه‌لاتيێن وه‌ڵاتێ خۆ به‌حسكر.”
وەزیرێ دەرڤەیێ سووریا ئاماژه ب وێ چه‌ندێ دا “كورد برا و خوشكێن مەنە و پێكهاتەیەكێ گرنگ و ڕەسەن يێن سووریانە و دڵنیایێ دده‌ين كو مافێن وان دێ دپاراستى ين.”
هەروەسا دياركر”وەزیرێ دەرڤەیێ سووریا، سەرۆكێ حكوومەتا هەرێمێ كوردستانێ بانگهێشتێ دیمەشقێ كر و گۆت هیڤیدارم كو د داهاتوویەكا نێزیكدا ته ل شامێ بینین.”
سەرۆكێ حكومەتێ دوپاتكر “پاراستنا ئاشتى و ئارامیا سووریا بۆ مە زۆر گرنگه و د ڤی ده‌رباره‌ی دا ئامادەينە بۆ پێشكێشكرنا هەموو پشتگیری و هاریكاریا پێدڤی بۆ برا و خوشكێن خۆ ل سووریێ.”
د ڕاگەهاندنێدا هاتیە “هەردولا ب هه‌ڤڕا بوون ل سەر پێدڤیا پاراستنا مافێ هەموو پێكهاتەیێن سووریێ و د ناڤبەرا وان دا گەلێ كورد.”
د بەشەكێ دی یێ دانوستاندنێ دا، بزاڤێن سەرۆك بارزانی بۆ نێزیككرنا لایەنێن كوردی و پاراستنا ئاسایش و ئارامیا سووریا بلند هاتنە نرخاندن.