ناڤەندا نووچەیان – سەما
نڤيسينگه‌ها جڤاتا روحانى يا بلند يا ئێزديان ئامارێن گرێبه‌ستێن هه‌ڤژينيێ ل ناڤا ئێزديان دا ل هه‌رێما كوردستانێ ئاشكرا دكه‌ت و دبێژت: “پرۆسه به‌ره‌ف زێده‌بوونێ يه”.
ل شه‌مبوويا بۆرى جڤاتا روحانى يا بلند يا ئێزديان كۆمبوونا خۆ ب سه‌رپه‌رشتيا مير حازم ته‌حسين به‌گ، ميرێ ئێزديان ئه‌نجامدا و بريار دا نه‌ختێ كچا ئێزدى ژ 75 گرامێن زێڕى بۆ 40 گرامان بێنه كێمكرن.
ئيرۆ دووشه‌مبوويێ 27ى كانوونا دووێ 2025ێ، عه‌لى خدر، رێڤه‌به‌رێ نڤيسينگه‌ها جڤاتا روحانى يا بلند يا ئێزديان تايبه‌ت بۆ سه‌ما راگه‌هاند: لدووڤ ئامارێن ل به‌ر ده‌ستێ وان، دناڤبه‌را سالێن 2022تا 2024ێ دا رێژا ئه‌نجامدانا پرۆسه‌يا هه‌ڤژينيێ ل ناڤا گه‌نجێن ئێزدى دا زێده‌بوويه كو دهه‌ر ساله‌كێ دا پترى 3 هه‌زار گرێبه‌ست ب ره‌زامه‌نديا جڤاتا روحانى هاتينه ئه‌نجامدان.
رێڤه‌به‌رێ نڤيسينگه‌ها جڤاتا روحانى ئاشكراكر:” پشتى بريارا كێمكرنا نه‌ختێ كچا ئێزدى هاتيه دان، پێشبينى دكه‌ين پرۆسه‌يا پێكئينانا ژيانا هه‌ڤژينيێ ژلايێ كچ و كوڕێن ئێزدى ڤه زێده ببت”.
گه‌نجێن ئێزدى ب گه‌رمى پێشوازيێ ل بريارا جڤاتا روحانى دكه‌ن و ب پێنگاڤه‌كا گرنگ ل قه‌له‌م دده‌ن كو بوويه بارسفكى ل سه‌ر ملێن گه‌نجان بكارن ژيانا هه‌ڤژينيێ پێك بينن.