ناڤەندا نووچەیان – سەما
سەرۆکێ بنگه‌هێ لالش يێ رەوشەنبیری و كۆمه‌ڵايه‌تى دبێژت، ب هویری و کویراهی دنێرمە لێدوانا دیرۆکی یا سەرۆک بارزانی دەربارەی بکارئینانا پەیڤا ‘پێکهاتەیان’ ل جهێ ‘کێمینەیان’، ئەڤ گوهۆڕینە د زمان و دەربڕینێ دا، پتر ژ گوهۆڕینا پەیڤەکێ یە، ئەڤە گوهۆڕینەکا بنگەهی یە د دیتن و تێگەهشتنا جڤاکی و سیاسی دا.
سەعید جردۆ، سەرۆکێ بنگه‌هێ لالش يێ رەوشەنبیری و كۆمه‌ڵايه‌تى ل دهۆكێ بۆ سه‌ما گۆت: لێدوانا دیرۆکی یا سەرۆک بارزانی دەربارەی بکارئینانا پەیڤا ‘پێکهاتەیان’ ل جهێ ‘کێمینەیان’ پتر ژ گوهۆڕینا پەیڤەکێ یە، ئەڤە گوهۆڕینەکا بنگەهی یە و ئەڤ پەیڤە دانپێدانێ ب رۆلێ دیرۆکی و بنگەهی یێ هەموو کۆمێن ئایینی و نەتەوەیی د دروستکرنا ناسناما کوردستانێ دا دکەت، کو پارچەکا سەرەکی و جودانەبووی نە د رابردوو، نهۆ و داهاتویێ کوردستانێ دا.
جردۆ گۆتژى:” ئەڤ دەستەواژە پەیامەکا روون هەیە بۆ نفشێن داهاتی ل کوردستانێ، کو چ کۆم ‘کێمینە’ نینن، بەلکو هەموو پشکەکن ژ پێکهاتا سەرەکی یا جڤاکی، ئەڤ یەک ژی دێ کارتێکرنەکا ئەرێنی ل سەر خوەناسین و باوەرى بخۆبوونێ یا نفشێن داهاتی هەبت”.
سەرۆکێ بنگه‌هێ لالش ئاماژە ب وێ چه‌ندێ دا: ئەڤ گاڤە دێ بتە ئەگەرێ بهێزکرنا پێکڤەژیانێ و تێگەهشتنێ د ناڤبەرا هەموو پێکهاتەیان دا، دەمێ هەر کۆمەک هەست ب وەکهەڤی و رێزگرتنێ بکەت، ئەوا جڤاکەکێ ساخلەمتر و یەکگرتیتر دێ پەیدا بت.
دبێژت ژی:” ئەڤ گوهۆڕینە د زمانی دا، دكارت ببتە نموونەیەک بۆ دەڤەرێ و جیهانێ د چەوانیا مامەلەکرنێ دگەل پرژیا جڤاکی و ئایینی، کوردستان دكارت ببتە نموونەیەکا سەرکەفتی یا پێکڤەژیانا ئاشتیانە و رێزگرتنا جوداهیان”.
سەرۆکێ بنگه‌هێ لالش ، پێشنیار ژی دکەت کو ئەڤ گوهۆڕینا زمانی ببتە پشکەک ژ سیستەمێ پەروەردە و راگەهاندنێ، پێدڤیە ئەم زارۆکێن خۆ فێری وێ یەکێ بکەین کو پرژیا جڤاکی و ئایینی، کانیا دەولەمەندی و هێزێ یە، نە یا لاوازیێ، هەروەسا، پێدڤیە ئەڤ دیتنا نوو رەنگڤەدانا خۆ د یاسا و رێسایێن هەرێما کوردستانێ دا هەبت و پێدڤیە هەموو پێکهاتە ب وەکهەڤی بەشداریێ د بریاردان و دامەزراوێن حکومی دا بکەن.
ئاماژە ب وێ یەکێ ژی کر: ئەڤ گاڤا سەرۆک بارزانی، نیشانا تێگەهشتنەکا کویر ە ژ گرنگیا یەکرێزی و یەکگرتنا گەلێ کوردستانێ، ئەڤە دەستپێکا رێکەکا درێژە، لێ گاڤەکا گرنگە بەرەف داهاتویەکێ گەشتر بۆ هەموو پێکهاتەیێن کوردستانێ.