ناڤەندا نووچەیان – سەما
نڤيسينگه‌ها جڤاتا روحانى يا بلند يا ئێزديان راگه‌هاند، بريارا كێمكرنا نه‌ختێ كچێ كه‌فتيه دوارێ بجهئينانێ دا و هه‌موو ئێزديێن جيهانێ ب خۆڤه دگرت.
ئيرۆ سێ شه‌مبوويێ 28ى كانوونا دووێ 2025ێ، نڤيسينگه‌ها جڤاتا روحانى يا بلند يا ئێزديان نڤيسارا فه‌رمى يا جڤاتا روحانى بۆ كێمكرنا نه‌ختێ كچێ به‌لاڤكر و دانه‌يه‌ك ب ده‌ست مالپه‌رێ سه‌ما كه‌فتيه و تێدا هاتيه، ل رێكه‌فتى 25-1-2025ێ، جڤاتا روحانى ب سه‌رپه‌رشتيا ميرحازم ته‌حسين به‌گ، ميرێ ئێزديان و ده‌سته‌يا شێوه‌رداريێ يا جڤاتێ كۆمبوو.
هه‌روه‌سا دياركريه، پشتى بۆچۆنێن مه‌زن و سه‌رۆك هۆز و موختارێن ئێزديان هاتينه وه‌رگرتن ل دۆر دياركرنا نه‌ختێ كچێ دگه‌ل بيروباوه‌رێن ئێزديان وگونجاندن ل گه‌ل كاودانێن نوكه ئێزدى تێرا ده‌رباز دبن، چه‌ند بريار ده‌ركرن.
بريارێن دكۆمبوونێ دا هاتينه دان بڤى شێوێ ل خوارێ نه:
– 40گرامێن زێڕى عه‌يار 21 بۆ نه‌ختێ كچێ هاتنه دياركرن و هه‌ر كه‌سێ كێمتر ژى وه‌رگرت ده‌ستخۆشيێ لێ دكه‌ين.
– ئه‌ڤ بريار ل هه‌موو ده‌ڤه‌رێن ئێزدى لێ ئاكنجى ل عيراقێ و جيهانێ دئێته بجهئينان.
– ئه‌ڤ بريار ل 25-1-2025دێ كه‌فته دوارێ بجهئينانێ دا.
پشتى جڤاتا روحانى ئه‌ڤ برياره ده‌رێخستى، گه‌نجێن ئێزدى ب گه‌رمى پێشوازى لێكرن و ب پێنگاڤه‌كا گرنگ نيشاندان بۆ گه‌نجێن بڤێن ژيانا هه‌ڤژينيێ پێك بينن.