ناڤه‌ندا نووچه‌يان – سه‌ما
ئيرۆ شه‌مبوويێ ئێكى شووباتا 2025ێ، شانده‌كێ مه‌ترانێن كه‌نیسه‌یێن بريتانیا و نه‌رویج، سه‌ره‌دانا په‌رستگه‌ها لالش كر و ژلايێ خالد نه‌رمۆ، نوونه‌رێ ميرێ ئێزديان و زه‌لامێن ئۆلى يێن ئێزديان هاته پێشوازيكرن.
خالد نه‌رمۆ، نوونه‌رێ ميرێ ئێزديان و شێوه‌رمه‌ندێ جڤاتا روحانی یا بلند يا ئێزدیان بۆ سه‌ما گۆت: ئيرۆ شانده‌كێ هه‌ڤپشك یێ پێكهاتی ژ مه‌ترانێن كه‌نیسه‌یێن بريتانیا و نه‌رویج سه‌ره‌دانا په‌رستگه‌ها لالشێ كر و ژ نێزیك ڤه هایداری دیرۆك و مه‌زلوومیه‌تا ئێزدیان بوون.
گۆتژى:” ره‌وشا نوكه ئێزدى تێرا ده‌رباز دبن مه گه‌هانده شاندێ ناڤبرى، نه‌خاسمه ڕه‌وشا ئاواره‌یان ل كه‌مپان و ده‌ڤه‌را شنگالێ و هه‌ڤسۆزیا خۆ ژلایێ مرۆڤایه‌تی، مه‌عنه‌وی و مادی ڤه دووپات كرن”.
خالد نه‌رمۆ راگه‌هاند ژى: شاندێ مه‌ترانان ل سالا 2014ێ پشته‌ڤانیا خۆ بۆ ئێزدیان نیشان دابوو، پشتى ئه‌و جينۆسايدا بسه‌رێ ئێزديان دا هاتى و نوكه ژی ئه‌و به‌رده‌وامن ل سه‌ر وێ پشته‌ڤانیێ.