ناڤەندا نووچەیان – سەما
ئیڕۆ ئێک شەمبوویێ 19ی چریا ئێکێ 2025، میر حازم تەحسین بەگ، میرێ ئێزدیان ل کوردستان، عێراقێ و جیهانێ سەرەدانا دەزگەهێ خێرخوازیێ بارزانی ل هەولێرێ کر و ل گەڵ موسی ئەحمەد، سەرۆکێ دەزگەهی کۆمبوو.
ب گۆڕەی ڕاگەهاندنا نڤیسینگەها جڤاتا ڕۆحانی یا بڵند یا ئێزدیان؛ د دیدارێ دا، میرێ ئێزدیان ئاماژە دا ڕۆل و کارێ گرنگێ دەزگەهێ خێرخوازیێ بارزانی بۆ خزمەتکرنا خەڵکێ د ماوێ 20 ساڵێن بوری دا، کو دەزگەهەکێ مەزنە و پشتەڤانییا تەڤایا تەخ و چینێن جڤاکی دکەت.
هەروەسا دیارکر، دەزگەهێ خێرخوازیێ بارزانی ڕۆلەکێ گرنگ بۆ پشتەڤانیکرنا جڤاکێ ئێزدی هەبوو ل دەمێ کۆمکوژییا ب سەرێ ئێزدیان هاتی ل 3ی تەباخا 2014، ل سەر دەستێ ڕێکخراوا داعش یا تیرۆرستی.
ژ لایێ خۆڤە، موسی ئەحمەد دیارکر، کو دەزگەھ یێ بەردەوامە بۆ پشتەڤانی و هاریکاریکرنا جڤاکێ ئێزدی.
