ناڤهندا نووچهيان – سهما
وەزیرێ پەروەردا حکومەتا ھەرێما کوردستانێ بڕیارەکا نوو ل دۆر جلوبەرگێن قوتابیان دەرکر و هۆشداریەکا توند دایە رێڤەبەرێن قوتابخانان کو رێگریێ ل هەر جۆرە بازرگانیەکێ بکەن و دایک و بابان نەچار نەکەن بۆ کڕینا جلكان ئاراستهى کۆمپانیەکا دیارکری بکەن.
ئيرۆ پێنج شەمبوويێ، 23ـی نیسانا 2026، ئالان حەمەسەعید، وەزیرێ پەروەردا حکومەتا ھەرێما کوردستانێ د کۆنفرانسەکێ ڕۆژنامەڤانی دا ڕاگەھاند، بۆ سالا خواندنێ 2026-2027 شێواز و ڕەنگێ جلكێن قوتابیان ژ باخچێ زاڕۆکان ھەتا پۆلا 12ێ ئامادەیی دێ ئێنە گوهۆڕین، چو ڕێڤەبەرێن قوتابخانەیان ماف نینە دایک و بابێن قوتابیان ئاراستە بکەن بۆ کڕینا جل و بەرگان ل جھەکێ یان کۆمپانیەکا دیارکری، بەلکو دایک و باب د ئازادن ل هەر جھەکێ بڤێت جلوبەرگان بۆ زارۆکێن خوە دابین بکەن.
ئاماژە ب وێ چەندێ ژی کر، ئەڤ پرۆسەیە ب چو ڕەنگان قۆرخکاری تێدا نینە و هەر بازرگانەک دكارت ل دووڤ وان دیزاین و ساخلهتێن ھاتینە دیارکرن، جلوبەرگان بینت یان دروست بکەت، ئەڤ ڕاگەھاندنا پێشوەختە بو وێ چەندێ یە داکو بازرگان و ناڤەندێن خواندنێ دەمێ پێدڤی ل بەر دەست بت و چو زیانێن دارایی نەگەھنە وان.
دەربارەی پارچەیێن جلكان ڕۆنكر، بتنێ 3 پارچە (پانتۆڵ، تیشێرتێ هچک کورت و تیشێرتێ هچک درێژ) وەک یەکپۆشی ھاتینە دیارکرن. وەزارەتا پەروەردێ بۆ کێمکرنا تێچوویێ، قەمسەلە و جلكێن وەرزشی ژ ناڤ پرۆسەیا یەکپۆشیێ دەرئێخستینە.
رەنگ ل دووڤ قۆناغێن خواندنێ ب ڤی ڕەنگی نە:
-باخچێ زارۆکان: تیشێرتێ نارنجی و پانتەرونێ نیلی.
-قۆناغا ١ ھەتا ٦ێ بنەڕەتی: تیشێرتێ مارۆنی و پەنتەرون یان تەنوورێ نیلی.
-قۆناغا ٧ ھەتا ٩ێ بنەڕەتی: تیشێرتێ نیلی و پەنتەرون یان تەنوورێ ڕساسی.
-قۆناغا ١٠ ھەتا ١٢ێ ئامادەیی: تیشێرتێ ڕساسی و پەنتەرون یان تەنوورێ ڕەش.