ناڤه‌ندا نووچه‌یان – سه‌ما
ئيرۆ ئينيێ 14ى شوباتا 2025ێ، ل په‌رستگه‌ها لالش، مير حازم ته‌حسين به‌گ، ميرێ ئێزديان پێشوازى ل ستيڤن هيكى، باڵيۆزێ بریتانیا ل عيراقێ كر.
سه‌ره‌دانا باڵيۆزێ بریتانیا بۆ په‌رستگه‌ها لالش د چارچوڤێ بزاڤێن شاهنشینیا ئێكگرتى بۆ پشته‌ڤانیا که‌مینه‌يێن ئۆلی ل عیراقێ، ب تایبه‌ت جڤاکا ئێزدی هاته ئه‌نجامدان.
دڤێ سه‌ره‌دانێ دا، میر حازم ته‌حسین به‌گ ب ئاماده‌بوونا قه‌شه غه‌زوان، پێشوازی ل باليۆزێ بريتانيا كر و تێدا دانوستاندن ل سه‌ر چه‌ندین بابه‌تێن گرنگ ده‌رباره‌ی ره‌وشا نوکه یا عیراقێ، ژوان ره‌وشا ئێزدیان ل ده‌ڤه‌را شنگالێ و كه‌يسا ئاواره‌یان كر.
میرێ ئێزديان دوپاتى ل سه‌ر گرنگیا پشته‌ڤانیا جڤاکا نێڤده‌وله‌تی بۆ ئێزدیان کر، نه‌خاسمه د سیبه‌را وان ئاسته‌نگان دا یێن کو روبه‌ڕوویێ وان دبن پشتی ساڵا 2014ێ ژ ئالیێ رێکخراوا داعشێ ڤه تووشی جینۆسایدێ بووین. هه‌روه‌سا بڕیارا ئه‌نجومه‌نێ نوێنه‌رێن عیراقێ ده‌رباره‌ی ئازادکرنا زيندانيان و مه‌ترسیا دووباره‌بوونا سیناریۆیا توندوتیژیێ ل دژی که‌مینه‌یێن ئۆلی ل عیراقێ به‌حسكرن.
ژلايه‌كێ دى ڤه، میرێ ئێزديان ئاماژه ب پێدڤیا دابینکرنا ئێمناهى و خزمه‌تگۆزاریێن سه‌ره‌کی بۆ ئاواره‌یان کر، داکو بكارن ڤه‌گه‌ڕن ده‌ڤه‌رێن خۆ یێن ڕه‌سه‌ن ل شنگالێ.
باڵيۆزێ بريتانيا ته‌كه‌زى ل سه‌ر پابه‌ندبوونا شاهنشینیا ئێكگرتی بۆ هاریکاریکرنا ئاواره‌یان و ده‌سته‌به‌رکرنا ڤه‌گه‌ڕیانا ئارام یا وان بۆ جهێن خۆ کر، هه‌روه‌سا ئاماژه ب گرنگیا هه‌ڤکاریا د ناڤبه‌را حکومه‌تا عیراقێ و حکومه‌تا هه‌رێما کوردستانێ دا کر بۆ جێبه‌جێکرنا رێککه‌فتننامه‌یا شنگالێ، کو ئارمانجا وێ ئاسانكرنا ڤه‌گه‌ڕیانا هه‌زاران ئێزدیانه بۆ ده‌ڤه‌رێن وان.