ناڤه‌ندا نووچه‌یان – سه‌ما
د ئێكەم بڕیارا ژ ڤى جۆرى ل سویدێ، دادگەهەكێ ب تۆمەتا جینۆسایدێ و ئەنجامدانا تاوانێن دژى مرۆڤایەتیێ بەرامبەر كوردێن ئێزدى سزايێ 12 سالان یێ زیندانێ ل سەر ژنەكێ سەپاند، بەرى نهۆ ژى د سالا 2022 دا ئەڤ ژنە سزايێ شەش سالان یێ زیندانێ ل سەر هاتبوو سەپاندن، ژبەركو رێ دابوو كوڕێ خۆ یێ 12 سالى بۆ شەڕكرنێ دگەل داعشێ بێتە بكارئینان.
دوهى ڕۆژا سێ شەمبوويێ، 11ێ شوباتا 2025ێ، دادگەهەكا سویدێ بڕیارەك دژى ژنەكا 52 سالى دەركر ب توهمەتا بەشداریكرنا د جینۆسایدێ دا دژى ئێزدیان، و سزايێ 12 سالان یێ زیندانێ ل سەر سەپاند، ئەڤە ئێكەم كەیسە ژ ڤى جۆرى دەربارەى وان تاوانێن كو رێكخراوا داعشێ دژى پێكهاتا كوردێن ئێزدى ئەنجام داین.
دانپێدانا دادگەهێ ئاماژە ب وێ چەندێ كر كو لین ئیسحاق، ب توهمەتا دەستبەسەركرن و كۆیلەكرنا ژن و كچ و زارۆكێن ئێزدى د مالا خۆ دا ل سوریا د زڤستان و بهارا سالا 2015ێ دا، هاتە دادگەهكرن و تاوانباركرن ب تاوانێن دژى مرۆڤایەتیێ و تاوانێن شەڕى یێن مەترسیدار.
دادگەهـ دبێژت: “كریارێن وێ بەشەك بوون ژ هه‌وه‌كا بەرفرەهـتر كو رێكخراوا توندرەو دژى پێكهاتا ئێزدی ئەنجام داین.”
دادگەهێ هەروەسا راگەهاند، تاوانێن وێ یێن هەژى سزايێ 16 سالان یێن زیندانێنه، لێ ب لبەرچاڤگرتنا سزايێ وێ یێ بەرێ، بڕیار هاتە دان كو سزایێ وێ 12 سال بن. ژن، كو وەلاتیا سویدێ یە، هاتە زیندانكرن، پشتى كو د سالا 2022ێ دا سزايێ شەش سالان یێ زیندانێ ل سەر هاتبوو سەپاندن، ژبەركو رێ دابوو كوڕێ خۆ یێ 12 سالى دگەل چەكدارێن داعشێ، بۆ شەڕكرنێ بێتە بكارئینان.
ل دووڤ راپۆرتەكا (france24)ێ، دادگەهێ ئاماژە ب وێ چەندێ ژى كر كو دۆسیا وێ پەیوەندى ب نەهـ قوربانیان ڤە هەیە، كو شەش ژ وان د دەمێ روودانا تاوانێ دا زارۆك بوون.
دادگەهێ زەلال كر كو ژنێ “ب ڕێیا دیلكرن و كۆیلەكرنا وان بۆ ماوێ پێنج مەهان دەستبەسەر كرینە و وەكى مولكێ خۆ مامەلە دگەل كرینە، د وى دەمى دا، لڤینا وان هاتیە سنورداركرن، هاتینە نەچاركرن كارێن مالێ ئەنجام بدەن و هندەك ژ وان وێنێن وان هاتینە گرتن بۆ رادەستكرنا وان بۆ كەسێن دى.”
دادگەهـ دبێژت: “ژبەركو ئەڤ ژنە بەشدارى د ڤەگوهاستنا قوربانیان دا كریە، لەوما بەرپرسیارە ژ بەردەوامبوونا زیندانیكرن و كۆیلەكرنا وان”.
دادگەهـێ هەروەسا دياركريه، سیستەمێ كۆیلەتیێ ئێك ژ وان كریاران بوو، یێن كو رێكخراوا داعشێ جێبەجێ كرین، ئەڤە ژى وەك تاوانێن دژى مرۆڤایەتیێ و تاوانێن شەڕى یێن مەترسیدار تێنە هەژمارتن، یێن كو دژى ئێزدیان هاتینە ئەنجامدان.
ل گۆڕ دەزگەهێ هەوالگریا سویدێ (SAPO)، نێزیكى 300 كەسێن سویدى یان ئاكنجیێن سویدێ، كو چارێكا وان ژن بوون، پەیوەندى ب رێكخراوا (دەولەتا ئیسلامى) یا ب ناڤێ داعش ڤە ل سووریا و عیراقێ كرینە، پرانیا پەیوەندیان ژى د سالێن 2013 و 2014ێ دا بوون.