ناڤه‌ندا نووچه‌یان – سه‌ما
رێكخراوا به‌تريكور بۆ مافێ مرۆڤى راگه‌هاند، ناسنامه‌يێن 32 روفاتێن دى يێن قوربانيێن ئێزدى ل به‌غدايێ هاتنه ئاشكراكرن.
پێنج شه‌مبوويێ 13ى شوباتا 2025ێ، رێكخراوا به‌تريكور بۆ مافێ مرۆڤى راگه‌هاند: ناسنامه‌یا گه‌ره‌كا دى يا قوربانيێن جینۆسایدا ئێزدیان ژلايێ نۆژداريا داد ل به‌غدايێ هاتنه ئاشكراكرن، پشتى پرۆسه‌یا وه‌رگرتنا سه‌مپلێن خوينێ DNA ل گه‌ڵ که‌سوکاریان وه‌كهه‌ڤ بووين ، ئه‌ڤ جانگۆرى يێن كو گيانێ وان ب دره‌ندانه برى دێ ڤه‌گه‌رنه هه‌مبێزا ئاخا خۆ تاكو ب سه‌ربه‌رزى و ل ناڤ كه‌سوكارێن وان بێنه ڤه‌شارتن.
رێكخراوا به‌تريكور ئاشكراكر:”د رۆژێن بێت دا دێ روفاتێن قوربانيان راده‌ستى كه‌سوكارێن وان ئێنه كرن و درێوره‌سمه‌كا ژ هه‌ژى دا دێ ئێنه ڤه‌شارتن و قوربانيدانا وان بلند ئێته گرتن”.
تيرۆرستێن داعشێ ب ده‌هان وه‌لاتيێن ئێزدى ده‌مێ ده‌ست بسه‌ر شنگالێ دا گرتى دناڤ گۆڕێن بكۆم دا گوله بارانكرن و پشتى ژناڤچوونا داعشێ هنده‌ك گۆڕێن بكۆم هاتنه هلدان و بۆ نۆژداريا داد ل به‌غدايێ هاتنه ره‌وانه‌كرن.
ل ساڵا 2014 داعش هێرش کرە سەر شنگالێ و زێده‌تر ژ 360 هەزار کەس ئاوارە بوون، پشكه‌كا وان چوونە دەرڤەی وه‌ڵاتى، هێشتا ب هه‌زاران خێزان ژ ئه‌گه‌رێ نه‌ئاراميا ده‌ڤه‌رێن وان ل شنگالێ ل ناڤا كه‌مپاندا ژيانا خۆ ده‌رباز دكه‌ن.