ناڤەندا نووچەیان – سەما
ئيرۆ شەمبوويێ 22ى شوباتا 2025، رێوره‌سمێن ب گۆڕكرنا 32 رووفاتێن قوربانيێن ئێزدى ل سه‌ر ده‌ستێ تيرۆرستێن داعشێ ل گوندێ كۆچۆ ب ڕێڤه‌چوون.
ب ئاماده‌بوونا بابێ شێخ، شێخ عەلی شێخ ئەلیاس و دگەلدا جۆقتا وی و به‌شداريا چەندین کەسایەتی و لایەنێن جودا، بەرپرس و نوونەرێن حکومەتێ، تیمێن ڤەکۆلینێن تایبەت، رێکخراوێن جڤاکا سڤیل ومالباتێن قوربانیان و کەسایەتی و ریهسپی و خەلکێ دەڤەرێ، رێوره‌سمێن ب گۆڕكرنا رووفاتێن 32 جانگۆریێن ئێزدیان ب رێز و حورمەت ل گۆڕستانا گوندێ کۆچۆ ب ڕێڤه‌چوون، یا کو دکەفتە باشوورێ چیایێ شنگالێ.
دڤێ رێورەسمێ دا، ب خواندنا قەول و بەیت و ب دەف و شباب و دوایێن تایبەت هاتنە کرن و چەندین په‌يڤ هاتنە پێشکێشکرن دەربارەی گرنگیا پاراستنا بیرەوەریا قوربانیان و پێدڤیا بەردەوامیا خەباتێ ژبۆ دادپەروەری و ناساندنا جینۆسایدا ئێزدیان ل سەر ئاستێ ناڤخۆیی و نێڤدەولەتی.
تێ زانین ئەڤ جانگۆریە، ئەوێن کو د دەستپێکا فەرمانا رەش دا، ل 3ێ تەباخا 2014ێ ب دەستێ تیرۆرستێن داعش هاتبوونە گرتن و پاشی ل هه‌مان مه‌هێ دا هاتنە شەهیدکرن.