ناڤەندا نووچەیان – سه‌ما
ئەنجوومەنێ نشتیمانی يێ کورد ل سووریێ (ئەنه‌که‌سه) د دەرھەقا کۆنفرانسێ دانوستاندنێ يێ سووريێ دە رادگەھینت، “برێڤەچوونا کۆنفرانسى ب ڤی ئاوایی کو پێکھاتەیێن سیاسییێن نەتەوەیی پشتگوھ خستينە و بنپێکرنا بنگەھێن مافێن ھەڤپارێن گەلێ کوردە د پرۆسەیا نوویا سیاسی ل وى وه‌لاتى دە،دبێژت“ئەم پشتەڤانیا دەولەتەکا ديمۆکراسی دکه‌ين.”
دوهى رۆژا دووشه‌مبوويێ 24ى شوباتا 2025ێ، ئەنجوومەنێ نشتیمانی یێ کورد ل سووریێ (ئەنه‌که‌سه) دپه‌ياننامه‌يه‌كێ دا كو دانه‌يه‌ك ب ده‌ست سه‌ما كه‌فتيه راگه‌هانديه و تێدا هاتيه:
ئەنجوومەنێ نیشتیمانی یێ کوردی ل سووریێ ئامادەکاریێن کۆنفرانسێ دیالۆگا سووریيێ دشۆپینت، یا کو ل ٢٤-٢٥ی شوباتێ ب رێڤه‌دچت، د چارچووڤێ هەلویستێ ئەنجوومەنێ یێ جێگیر دا بۆ پشتەڤانیکرنا هەر بزاڤه‌كێ کو دێ هاریکاریا گەهشتنا ب ڕاگوهاستنەکا سیاسیا گشتگیر کەت، یا کو دێ داويێ ئینت ب ئازارێن سووریيان ڤە و دێ بنیاتێ دەولەتەکا دیموکراتیک و نالامەرکەزی دانێت، کو ژ نەتەوە و ئایین و چاندێن جۆراوجۆر پێک دئێت، و دەستوورا وێ دێ مافێن هەموو پێکهاتان دەستەبەر کەت، نەخاسمە مافێن گەلێ کورد ل گۆر پەیمانێن نێڤدەولەتی.
گرێدانا کۆنفرانسى ب ڤێ لەزاتییێ و ڕاگەهاندنا وى بەری ڕۆژەکێ، و پەراوێزکرنا پێکهاتێن سیاسی و نەتەوەیی ب تایبەت ئەنجوومەنێ نیشتیمانی یێ کوردی د ئامادەکاری و پلاندانانێ دا، وەک پێشێلکرنا پره‌نسیپ و مافێ هەڤپشکییا نیشتیمانی یا گەلێ کورد تێتە دیتن، یا کو دڤێت بناغەیێ هەر دانوستاندنه‌كا جددی بت کو ل دووڤ ڕێککەفتنەکا نیشتیمانى یا ڕاستەقینە دگەڕت.
ڤەخواندنا کەسان ب ڕێکەکا هەلبژارتی و تاکەکەسی، دوور ژ پیڤەرێن دیار کو نوێنەرایەتییەکا هەڤسەنگ ژبۆ هێزێن سیاسی و پێکهاتێن جۆراوجۆرێن سووری، ب تایبەت بزاڤا سیاسییا کوردی، دەستەبەر دکەت، پرسیارێن گرنگ دەربارەی کاریگەرییا کۆنفرانسى و شیانا چارەسەرکرنا کێشەیێن جۆراوجۆر یێن کو سیستەمێ کەڤن پاش خۆ هێلاین، دئێختە بەرچاڤ. هەروەسا کورتاهییا دەمێ ئامادەکارییا کۆنفرانسى و نەڕەچاڤکرنا بارودۆخێن بەشداربویان ژ ناڤخوە و دەرڤەى سووریێ، شانسێن سەرکەفتنا وى بۆ گەهشتنا ئارمانجێن وى یێن بەرچاڤ د ئاڤاکرنا سووریایا پێشەرۆژێ دا، لاواز دکەت.
هەرچەندە ئەنجوومەن پشتەڤانییا خۆ بۆ هەر پڕۆسەیەکا سیاسی کو بناغەیان دادنێت بۆ ئاڤاکرنا سووریایەکا نوو کو تێدا جهـ بۆ زۆرداری و قەدەغەکرنا پێکهاتێن سیاسی و نەتەوەیی نینە، دووپات دکەت، لێ دبینت کو هەر دانوستاندنه‌كا نیشتیمانى یا ڕاستەقینە نكارت نیڤەکری بت یان ل سەر بنگەهێ پشتگوهخستنا پێکهاتێن گەلێ سووریێ بت، و نكارت ئارمانجێن خۆ بدەستڤە بینت ئەگەر چارەسەرکرنا مافێن ڕەوا یێن هەموو پێکهاتان، ل گۆڕ بنەمایێن دیار و دەستنیشانکری کو دەستەبەریا گەهشتنا ب چارەسەرییەکا سیاسییا داد دکەن، دەستەبەر نەکەت، یا کو دێ داويێ ب تراژیدیا سووریان ئینت و ئاسۆیان ژبۆ پێشەرۆژەکا دیموکراتیک کو ئارامی و دادپەروەرییێ دێ بدەستڤەئینیت، ڤەکەت.
بارودۆخێن کارەساتی یێن کو سووری ئيرۆ تێدا دژین، پێتڤی ب ڕێکارێن لەز و کاریگەر ژ بۆ چارەسەرکرنێ نە، ل ڕێکا پڕۆسەیەکا سیاسییا جدی و گشتگیر، یا کو دێ داويێ ب ئازارێن وان ئینت و دێ داخوازێن وان یێن ڕەوا ژبۆ ئازادی و شکۆداری و دادپەروەریێ بده‌ستڤه‌ئينت.