گوته‌بێژێ حكومه‌تا هه‌رێما كوردستانێ ئاماژه ب وێ ددەت، هه‌موو هه‌ولێن دده‌ن داكو پێش جه‌ژنێ مووچێ هه‌یڤا ئادارێ (سێ) دابه‌ش بكه‌ن.
پێشه‌وا هه‌ورامانى، پەیڤدارێ حكومه‌تا هه‌رێما كوردستانێ د پوسته‌كى دا ل تورا جڤاكيا فه‌یسبووكێ راگه‌هاند، د كۆمبوونا ئيرۆ چارشه‌مبوويێ، 12-03-2025 یا ئه‌نجومه‌نێ وه‌زيران، سه‌رۆك وه‌زيران مه‌سرور بارزانى، سه‌رجه‌م وه‌زير راسپاردن، وه‌زاره‌تێن وان بله‌ز ليستا مووچه‌يێ هه‌یڤا ئادارێ (سێ) ئاماده بكه‌ن و بۆ به‌غدا بهنێرن، هه‌روه‌سا د رۆژێن بێهنڤه‌دانێ ژى ده‌وام بكه‌ن بۆ وێ ئه‌گه‌رێ بزاڤ بێنه دان به‌رى جه‌ژنێ مووچه‌يێ وێ هه‌یڤێ ژى دابه‌ش بكه‌ن.
پەیڤدارێ حكومه‌تا هه‌رێما كوردستانێ، بۆ كوردستان24 راگه‌هاند: ئه‌ڤ هه‌یڤه زووتر ژ هه‌یڤێن بوورى، ليستا مووچه‌يى دێ ئێته ئاماده‌كرن. مه دڤێت ده‌م ل به‌ر ده‌ستێ مه بت بۆ چاره‌كرنا هه‌ر كێشه و به‌هانه‌كا نوو كو وه‌زاره‌تا دارايى يا عيراقێ بو مه تينت، چنكو مه دڤێت زووتر دراڤ بێته مه‌زاختن و بكارين به‌رى جه‌ژنێ مووچێ هه‌یڤا ئادارێ (سێ) دابه‌ش بكه‌ین.”
ئه‌ڤه د ده‌مه‌كى دا يه، وه‌زاره‌تا دارايى و ئابوورى د راگه‌هاندنه‌كێ دا ئاماژه ب وێ چه‌ندێ دا، پشتى دو هه‌فتيان ژ كۆمبوونێن چر و پر یێن ناڤبه‌را تيمێ ته‌كنيكى یێ وه‌زاره‌تا دارايى یا حكومه‌تا فيدرال و وه‌زاره‌تا دارايى یا هه‌رێما كوردستانێ، ئيرۆ چارشه‌مبوويێ، 12-03-2025، كوژمێ 957 مليار و 925 مليۆن و 880 هه‌زار و 78 دينارى وه‌ك ته‌مويلا مووچێ هه‌یڤا شوباتێ (دو) يێ فه‌رمانبه‌ر و مووچه‌خۆران هاته دانان ل سه‌ر هه‌ژمارا بانكيا وه‌زاره‌تا دارايى و ئابوورى یا حكومه‌تا هه‌رێما كوردستانێ ل لقێ هه‌ولێرێ یێ بانكا ناڤه‌ندى یا عيراقێ.
وه‌زاره‌تا دارايى و ئابوورى ئه‌و ژى خستیيه به‌رچاڤ، سبه‌ى پێنج شه‌مبوويێ، 13-03-2025، ده‌ست ب دابه‌شكرنا مووچێ هه‌یڤا شوباتێ یێ فه‌رمانبه‌ر و مووچه‌خورێن هه‌رێما كوردستانێ دێ ئێته كرن و د چه‌ند رۆژه‌كان دا مووچێ سه‌رجه‌م مووچه‌خۆران دێ ئێته دابه‌شكرن.