ناڤه‌ندا نووچه‌یان- سه‌ما
ل سنوورێ قه‌زا شنگالێ زێده‌تر ژ 50 سالایه كێشه‌یا كێمیا ئاڤا ڤه‌خوارنێ هه‌یه، ب تایبه‌تی ل ناحیا سنوونێ و هه‌ر شه‌ش كۆمه‌لگه‌هێن ب سه‌رڤه، ئه‌ڤێ چه‌ندێ ژی وه‌كریه خواست ل سه‌ر كرینا ئاڤێ ب تانكان زێده ببت.
ده‌رباره‌ی ڤی بابه‌تی،فادی قاسم، ئێک ژ وه‌لاتیێن کۆمەلگەها دۆهلا ل ناحیا سنوونێ بۆ سه‌ما گۆت: “رۆژانه خه‌لكێ ده‌ڤه‌رێ ئاڤێ ب تانكا دكرن و هه‌ر هه‌زار لتر ب پێنج هه‌زار دینارانه و ئه‌گه‌ر ئاڤا تانكێن كڕیارێ نه‌بت، وێ رۆژێ ئه‌م د بێ ئاڤن.”
زێده‌تر گۆت: “ئاڤا بیرێن گوندێ دهۆلا ب كێر ڤه‌خوارنێ نائێـت و هه‌روه‌سا بۆ چاندنێ و گشتوكالی ژی نه‌یا گونجایه.”
ژێدەرەکی ئاگەهدار ژ بابەتی بۆ سەما گۆت: “چارەسەری ژبۆ کێشەیا ئاڤێ ل شنگال و دەوروبەران ئەوه، پرۆژەیێ تۆرا ئاڤێ ئەوا بریار بوو ژ زوممار بێت بکەفتە د وارێ جێبەجێکرنێ دا، بتنێ ئەو مایە دراڤ ژلایێ بەغدایێ ڤە بێتە تەرخانکرن.”
هەمان ژێدەر هۆشداریێ ددەت: “ئەگەر هات و ئەڤ پرۆژە چێنەبوو، د سالێن بێت دا ژبەر نەبوونا ئاڤێ دێ کارەساتێن مرۆڤی ل دەڤەرێ چێبن.”
ل گۆڕ زانیاریێن ب ده‌ست سه‌ما كه‌فتین، كێشه‌یا نه‌بوونا ئاڤێ ل پتريا ده‌ڤه‌رێن شنگالێ سه‌رهلدايه، ب تایبه‌ت ل كۆمه‌لگه‌هێن دهۆلا و دووگرێ و بورک ل باکوورێ چیایێ شنگالێ، هەمان کێشە ل کۆمەلگەهێن باشوورێ شنگالێ ژی هەیە. ئه‌ڤێ چه‌ندێ كارتێكرن ل سه‌ر ژینگه‌هێ كرییه، عه‌ردێ به‌یاری ژی ل ده‌ڤه‌رێ رۆژ ب رۆژ زێده‌تر دبت.
زانیاری وەسا دده‌نه خویاکرن، هه‌ر خێزانه‌كا ل ناحیا سنوونێ و ده‌وروبه‌ران رۆژانه ئاڤێ ژ بۆ ڤەخوارنێ دكڕن. ل گۆڕ ژێده‌رێن پزیشكی ژی، ئاڤا پتریا بیرێن ئیرتیوازی ل شنگالێ یا ساخله‌م نینه و بوویه سه‌ده‌مێ په‌یدابوونا نه‌خۆشیان.
پرۆژه‌یه‌ك هه‌بوو كو ئیداره‌یا خوه‌جهـ یا نه‌ینه‌وا ب ڕێكا تۆره‌كێ ئاڤێ ژ ناحيە زوممار بكشينه شنگالێ، داكو كێشه‌یا ئاڤێ بێته چاره‌سه‌كرن، لێ هه‌تا نهۆ ئەو پرۆژە نەهاتیە چێکرن.