مەسرور بارزانی، سەرۆکێ حکومەتا هەرێما کوردستانێ ل 37هەمین ساڵڤەگەڕا کیمیابارانکرنا هەڵەبچە دپەیامەکێدا دبێژت: د سالڤەگەرا کیمیابارانکرنا باژێرێ هەڵەبچه و ده‌وروبه‌رێن وێ، ئیرۆ ب رێز و شکۆ یادا شەهیدێن ڤێ کۆمەلکوژیا رژێما به‌رێ یا عێراقێ دکەین و هەردەم د بیرا مەدانە. پێزانینا مە یا زۆر بۆ قوربانیدانێن خەلکێ نیشتمانپەروەر و تێکۆشەرێ هەڵەبچە، ب تایبەتی بریندارێن کارەساتێ و کەسوکارێن سەربەرزێن شەهیدان هەیە.
دیسان دبێژت: سەرەرای ده‌ربازبوونا (37) سالان، ب سەر ڤێ کارەساتا مەزن، هێشتا ژان و برینێن ڤێ تاوانێ ساڕێژ نەبووینە. لەوما ئەرکێ مه هەموويانه، کار ل پێناڤ زێدەتر ناساندنا جینۆسایدا هەڵەبچە و ئەنفال و هەموو تاوانێن دی، یێن کو بەرامبەر گەلێ کوردستانێ هاتینە کرن، بکەین و خزمەتەکا زێدەتر یا بنەمال و کەسوکارێن شەهیدان و قوربانیێن ڤان تاوانان بکەین.
د بەشەکێ دی یێ پەیاما سەرۆکێ حکومەتێ دا هاتیە: “حکومەتا هەرێما کوردستانێ، ب ئەرکێ سەرەکیێ خۆ دزانت کو خزمەتەکا شایستە یا هەڵەبچەییان و قوربانیێن دی یێن جینۆسایدا گەلێ کوردستانێ بکەت. د سالێن بۆری ژی، چەندین پرۆژەیێن خزمەتگۆزاری د بوارێن جۆراوجۆر دا ل پارێزگەها هەڵەبچه ئەنجامداینە، بەلێ دزانین هەڵەبچە پێدڤى ب خزمەتێن زێدەتر هەیە، ژ ڤێ روويى ڤه، ئاكنجيێن بەڕێز و قوربانیدەر یێن پارێزگەها هەڵەبچه دلنیا دکەین کو د داهاتیدا ژی، زێدەتر و باشتر خزمەتا ڤێ ده‌ڤه‌رێ دێ کەین”.
ئەوا جێی داخێیە، حکومەتا فیدرال هەتا نهۆ، بەرپرسیاره‌تیا دەستووری و یاسایی یا خۆ د قەرەبووکرنا بنەمالە و کەسوکارێن قوربانی و شەهیدێن هەڵەبچه و ئەنفالکریان جێبەجێ نەکریە. تەنانەت هەتا نها ژی، ئەنجوومەنێ نوێنەران پرۆسەیا ب پارێزگەبوونا هەڵەبچه پەسەند نەکریە. لەوما داخواز دکەین ئیدی کێمتەرخەمی بەرامبەر قوربانیدانێن هەڵەبچه نەئێتە کرن و ب شێوەیەکێ شایستە، بێنە کرن قەرەبووكرن و ب پارێزگەبوونا وێ ژی د دەمەکێ زوودا بێتە پەسەندکرن.
د داویا پەیاما خۆدا، مەسرور بارزانی، سەرۆکێ حکومەتا هەرێما کوردستانێ دبێژت: “سلاڤ ل گیانێ پاقژ یێ شەهیدێن هەڵەبچه و گشت شەهیدێن کوردستانێ”.