ناڤه‌ندا نووچه‌يان – سه‌ما
ب چاڤدێرييا سەرۆكێ حكومەتا هەرێما كوردستانێ، كۆنفرانسه‌كێ زانستى يێ نێڤدەوڵەتى دەربارەی ئێزديان، ئايين، كەلتوور، ديرۆك و جوگرافيا، ل زانكۆيا دهۆكێ دێ ب ڕێڤەچت.
رۆژێن 29 و 30ى نيسانا 2025ێ، ب چاڤدێرييا مەسرور بارزانى، سەرۆكێ حكومەتا هەرێما كوردستانێ و ب هەماهەنگيا بنگەهێ لالش يێ رەوشەنبيرى و كۆمه‌ڵايه‌تى و زانكۆيا دهۆكێ، كۆنفرانسه‌كێ زانستى يێ نێڤدەوڵەتى دەربارەی ئێزديان، ئايين، كەلتوور، ديرۆك و جوگرافيا، ل هۆلا كۆنفرانسان ل زانكويێ دێ ئێتە گێڕان.
هه‌ژمارەكا ڤەكۆلەران ژ زانكويێن هەرێما كوردستانێ، عيراقێ و وەلاتێن بيانى، دێ بەشداريێ د كۆنفرانسێ دا كەن و بەحسێ ئايين، ديرۆك، جوگرافيا و داب و نەريتێن ئێزديان كەن.
سەرۆك وەزيران مەسرور بارزانى، هەردەم گرنگى ب ئێزديان دايە و مەهانە مينحە بۆ وان دابينكرينە، هەروەسا پترى سێ هه‌زار رزگاربوويێن ئێزدى ژ دەستێ داعش ژ هه‌ردو ره‌گه‌زان مەهانە مووچەيى وەردگرن.
هەروەسا سەرۆك وەزيران مەسرور بارزانى، ل ڕۆژا سێ شەمبوويێ 15ى نيسانا 2025ێ، ب هه‌لكه‌فتا جه‌ژنا سەرێ ساڵا ئێزديان، د پەيامەكێ دا سەرەرايى پيرۆزباهيكرنێ ل ئێزديان، پشتەڤانيا خۆ بۆ ماف و داخوازيێن وان دوبارە كر.
د پەياما سەرۆك وەزيران دا ئاماژە ب وێ چەندێ ژى هاتيە كرن، كو د بزاڤ و تێكوشينێن خۆ دا دێ دبەردەوام بن هەتا كو رەوشا شنگالێ ئاسايى ببته‌ڤە، بۆ هندێ كو ئاوارە بكارن ڤەگەرنه سەر مال و حالێن خۆڤه.
