عنته‌ر کلۆ: ئێزدیاتی ب خۆ خێرە

۱–خێر بۆ جەژن و هەلکەفتان

۲– خێر بۆ ئێختیم و بەلنگاز و نەساخا

۳– خێر بۆ پاراستن ژ قەدا و بەلایە

٤– خێر بۆ مرییا

٥–خێر بۆ ئاڤەدانیێ

٦– خێر بۆ تێرکرنا نەفسێ

۷– خێر بۆ خاس و چاکان

٨– خێر بۆ سەفه‌ر و ئۆغەران.

نێزیک بوونا جەژنا سەر سالا مە ئێزدیان

ھەر خێرخوازەک دەستێ ھاریکاریێ بۆ خێزانەکا کێم دەرامەت، سێوی، نەساخەکی درێژکەت خودێ و خاس و چاکێن مە ئێزدیان خێرا وی قەبول بکەت و دەرگەھێ خێرا بۆ وی و مالا وى ڤەکت و ژ قەدا و بەلایێن دنیایێ ب سترینت.

سەبه‌قەکە قەولێ بەدیلا غەدارا دبێژت:

ئێزدیاتی گەلەکە

ئەرکانەک خێرە ئێک خلمەتە

ئێک غیرەتە ئێک مروەتە

ئێک قەلەما گرتیە ئێک زنێ نەکە

ب ڤان ئەرکانە ناڤ دئێتە سەرتە.

سەبقەکە قەولێ شەقەسەری دبێژت:

1-ئەگەر تە خێرەک دابت

تە د ئاڤێ دا بەردابت

ل با خودێ ھندا نابت.

2-هەکە تو کەسەکی ببینی

خێرەکە ڤێرا ب گەهینی

نە بێژێ تو ژ کی دینی.

سەبقەکە قەولێ مشتاقێ سێ بۆرم دبێژت:

هوون ل خلمەتێ نە د کسلان بن

ل خێر و چاکیا نە د پۆشمان بن

دا ل ئاخرەتێ نە د سەفیھـ و سەرگردان بن.

سەبقەکە قەولێ ئاساسێ دبێژت:

هەکە تو خێرەکێ بکی ب ئەهلێ خودێ را

هەکە تو کەڕەکی نانی بدەی ب رێرا

تە هەق هەیە باتن ل تە بکە فێدا.

سەبقەکە قەولێ ئافرینا دنیایێ دبێژت:

عەرد و عەزمان ددن خێرێ

هوین ژی ببن خودانێ بەهرێ

قەت ژبیر نەکن ڤێ خەبەرێ.

سەبقەکە قەولێ مسکینۆ ژارۆ دبێژت:

نابت مرنێ ژ خەیال کەن

ل وە فەرە خێرا بکەن

بەری وە ژ هێرە ببەن.