ناڤه‌ندا نووچه‌يان – سه‌ما
سەرۆکێ حکومەتا هەرێما کوردستانێ ل فڕۆکەخانا نێڤدەولەتى یا هەولێرێ پێشوازى ل سەرۆکوەزیرێ عیراقێ کر.
بەرى نیڤرۆيا ئيرۆ شەمبوويێ، 12-4-2025، محەمەد شیاع سودانى، سەرۆکوەزیرێ فیدرال گەهشتە فڕۆکەخانا نێڤدەولەتى یا هەولێرێ و ژ لایێ مەسرور بارزانى، سەرۆکێ حکومەتا هەرێما کوردستانێڤە پێشوازى لێ هاتە کرن.
هەروەسا باسم عەوادى، په‌يڤدارێ حکومەتا عیراقێ بۆ مالپەرێ کوردستان24 راگەهاند: سەرەدانا سەرۆکوەزیران سودانى بۆ هەولێرێ “د چارچووڤێ پرەنسیپێ پەیوەندى و دانوستادنێ ل سەر پرسێن گرنگ یێن دناڤبەرا بەغدا و هەرێما کوردستانێ دئێت و حکومەت دخوازیت ڤى پرەنسیپى دگەل هەموو لایەنێن بەشداربوویێن پرۆسەیا سیاسى بپارێزت.
دەربارەى تەوەرێ جڤینێن سەرۆکوەزیرێ عیراقێ دگەل بەرپرسێن هەرێما کوردستانێ، عەوادى گۆت “سودانى دانوستاندن و راوێژێ دێ کەت کو پێكهاتيه ژ پێداچوونەڤەیا پرسێن هەڤبەش د بن رۆناهییا پێشهاتێن ناڤخۆیى و دەرەکى دا.”
سودانى ژ دەمێ بوویە سەرۆکوەزیرێ عیراقێ چوار جاران سەرەدانا هەرێما کوردستانێ کرییە، داوى جار، رۆژا 13-11-2024، بوو. وى دەمى دگەل سەرۆک بارزانى، نێچیرڤان بارزانى، سەرۆکێ هەرێما کوردستانێ و مەسرور بارزانى، سەرۆکێ حکومەتا هەرێما کوردستانێ كۆمبوو.
