ناڤه‌ندا نووچه‌يان – سه‌ما
ب به‌شداريا ب هه‌زاران ئێزديان ل وه‌لات و ژ ده‌رڤه‌ى وه‌لاتى، رێوره‌سمێن جه‌ژنا سه‌رێ ساڵا ئێزديان ل په‌رستگه‌ها لالش هاتنه گێران.
جەژنا سەرساڵێ كەڤنترین جەژنا ئێزدیایە دكەفتە چارشەمبوویا ئێكێ ژ مەها نیسانێ ب هژمارا رۆژهەلاتی، كەڤناتیا وێ دزڤرتە دەستپێكا ئافراندنا كنیاتێ، دەمێ پەدشای دور ژ نوورا خۆ نژاندی و ئاخ و ئاڤ و بای و ئاگر ژێ پەیداكرین،و كنیات پێ ئافراندی.
پێنج شه‌مبوويێ، 17-4-2025،، لوقمان سلێمان، به‌رپرسێ راگه‌هاندنا په‌رستگه‌ها لالش بۆ سه‌ما راگه‌هاند: ئيساله رێوره‌سمێن جه‌ژنا سه‌رێ ساڵا ئێزديان دكه‌شه‌كێ ئارام دا و بێ هيچ جۆره كێشه‌يه‌ك ل په‌رستگه‌ها پيرۆزا لالش ب ڕێڤه‌چوون.
به‌رپرسێ راگه‌هاندنا په‌رستگه‌ها لالش، گۆتژى: نێزيكى 50هه‌زار ئێزديان ل سه‌رانسه‌رى جيهانێ و خه‌ڵكێ بيانى ژى ب تايبه‌ت ل رۆژهه‌لاتێ كوردستانێ به‌شدارى ل رێوره‌سمان ل لالشا نوورانى كرن.
لوقمان سلێمان دبێژت: “بڤێ هه‌لكه‌فتێ ئێزدى هه‌موو ل هه‌ڤ كۆمڤه‌بوون و پتر ژ سالێن بۆرى ئێزديێن ژ ده‌رڤه‌ى وه‌لاتى ئيساله سه‌ره‌دانا هه‌رێما كوردستانێ و لالشێ كريه”.
ساڵانە ب هه‌لكه‌فتا جه‌ژنا سەرێ ساڵا ئێزدیان ب هەزاران وه‌لاتيێن ئێزدی ب جلوبەرگێن ڕەسەن، ل پەرستگەها لالش کۆم دبن و جەژنا ساڵیا نوودگێڕن، ل هێڤارا جه‌ژنێ ژى ب دوايان و ب ڤێخستنا چرايان لالشێ رۆن دكه‌ن.