ناڤەندا نووچەیان – سەما
تۆم باراک، هنارتیێ تایبەتێ سەرۆک ترامپی بۆ کاروبارێن سووریێ، پەیوەندییەکا تێلەفۆنی یا گرنگ و بەرهەمدار دگەل سەرۆك بارزانی ئەنجامدا.
د پەیوەندییا تێلەفۆنیدا، هەردوولا ب هووری ڕەوشا سووریا و پێشڤەچوونێن ئەمنی گوتۆبێژکرن و دوپاتی ل سەر پێدڤییا پاراستنا ئاگربەستێ و بەردەوامبوونا پڕۆسەیا گەهاندنا هاریکارییێن مرۆڤی بۆ لێقەومییان کر، ب تایبەت بۆ باژێرێ کۆبانێ کو د نوکەدا پێدڤیەکا زۆر ب کەلوپەلێن نێڤدەولەتییان هەیە.
تۆم باراک، هنارتیێ تایبەتێ سەرۆک ترامپی بۆ کاروبارێن سووریێ د پەیامەکێدا کو ل تۆرا جڤاکییا ئێکس بەلاڤکریە، ئاماژە کریە، کو پاراستنا ئارامییێ ل سووریا و ڕێگریکرن ل تێکچوونا ڕەوشا مرۆڤی ژ کارێن دەستپێکییە، هەروەسا د تەوەرێ دووێ یێ پەیوەندیێدا، باس ل ڕەوشا سیاسییا عێراقێ کر و تۆم باراك هەلویستێ فەرمی یێ وەلاتێ خۆ بۆ سەرۆك بارزانی دوپاتکر.
تۆم باراك دوپاتکر، حکومەتەك کو ل بن هەژموونا ئیرانێ دابیت، نە ب تنێ نەشێن هیڤییێن وەلاتیان بجهــ بینن، بەلکو دێ بیتە ڕێگر ل هەمبەر دروستکرنا هەڤپشکیەکا کارتێکەر و بهێز دگەل ویلایەتێن ئێکگرتی یێن ئەمریکا.
ئەڤ هەلویستە نیشانا دلگرانییا کوور یا واشنتنە بەرامبەر پرۆسەیا سیاسی ل بەغدا و بزاڤکرن ژ بۆ دوورخستنا عیراقێ ژ هەڤسەنگییێن نێڤدەولەتی.
ئەڤ پەیوەندییا تێلەفۆنی یا هنارتیێ تایبەتێ سەرۆک ترامپی بۆ کاروبارێن سووریێ دگەل سەرۆك بارزانی، د دەمەکی دایە کو عێراق و سووریا ل هەمبەر گوهۆڕینێن سیاسی یێن مەزن دانە و ململانێ یێن جەمسەرێن هەرێمی بۆ فەرزکرنا هەژموونێن خۆ گەهشتینە گۆپیتکێ، واشنتن ب ڕێکا ئەڤان جۆرە پەیوەندیان دڤێت پەیاما خۆ یا ڕۆهن بگەهینیت، کو ب تنێ پشتەڤانییێ ل ئەوان حکومەت و لایەنان دکەت، یێن کو ب سەربەخۆیی بڕیار و بەرژەوەندییێن گەلێن وان د پارێزن و نە کەڤتینە بن کارتێکرنا ئەجێندایێن وەلاتێن جیران.