ناڤه‌ندا نووچه‌يان – سه‌ما
ل ڕۆژا چارشه‌مبوويێ 23ى نيسانا 2025ێ، ب ئامادەبوونا سەرۆك مه‌سعود بارزانی و سەرۆکێ هەرێما کوردستانێ و سەرۆکێ حکومەتا هەرێما کوردستانێ و و زێده‌تر ژ 400 سه‌ركرده و به‌رپرسێن هه‌رێما كوردستانێ و وه‌لاتان، ل ژێر دروشمێ “به‌ره‌ف ئێكبوونێ د باوه‌ریێ دایه” ڕۆژا دوایێن نشتیمانى ل هه‌ولێرا پايته‌خت هاته گێڕان.
د ڕێوڕەسمان دا هەر ئێك ژ سەرۆک مەسعود بارزانی، نێچیرڤان بارزانی، سەرۆکێ هەرێمێ و مەسرور بارزانی، سەرۆکێ حکومەتا هەرێما کوردستانێ و چەند سەرکردە و کەسایەتیێن دى ل عيراقێ و جیهان گۆتار پێشكێشكرن.
دڤى ده‌رباره‌ى دا، د.خه‌له‌ف شنگالى، ئێك ژ ئه‌ندامێن بۆردێ راوێژكارى يێ ڤێ هه‌لكه‌فتێ بۆ سه‌ما راگه‌هاند: د ڕۆژا دوایا نشتیمانى دا سه‌رۆك بارزانى و سه‌رۆكێ حكومه‌تا هه‌رێما كوردستانێ دوپاتى ل مافێ هه‌موو ئايينێن هه‌رێما كوردستانێ كر و پابه‌ندبوونا حكومه‌تێ بۆ پاراستنا ئازادييا ئايينى و پێشڤه‌برنا پێكڤه‌ژيانێ دياركر.
د.خه‌له‌ف شنگالى دبێژت: د په‌نه‌لێن ڕۆژا دوايا نشتيمانى دا گه‌له‌ك گرنگى ب كه‌يسا ئێزديان هاته دان و گاڤه‌كا باش بوو حكومه‌تا هه‌رێمێ سه‌ره‌دانه‌ك بۆ پشكدارێن دوايا نشتیمانى رێكئێخست كو سه‌ره‌دانا مزگه‌فت، كه‌نیسه و په‌ره‌ستگه‌ها لالش و جهێن ئۆلى یێن دى یێ سه‌مبولێن ئۆلێن جودا بكه‌ن.
دڤێ ڕۆژێ دا کەسایەتیێن ئایینێن ئیسلامێ، کریستییان، ئێزدی و ئایینێن دی، هەموويان پێکڤه دوايا ب كۆم بۆ هەرێما کوردستانێ كرن.
رۆژا دوايا نشتیمانى، ڕۆژه‌كه بۆ رێزگرتن و ل بیرئینانا پێكڤه‌ژیانا ئاشتیانه دناڤبه‌را پێكهاته و ئۆلێن جودا یێن هه‌رێما كوردستانێ. ئێكه‌م ساله ل هه‌رێما كوردستانێ ب ڕێڤه‌دچت و دێ بته نه‌ريته‌كێ سالانه.