ناڤه‌ندا نووچه‌یان – سه‌ما
ڤەکۆلەر و پسپۆرێ شوینەواری کۆڤان ئیحسان ژ فەرمانگەها شوینەوارێن پارێزگەها دهۆکێ، رۆژا شەمبوويێ 3-5-2025، دیارکر کو باژێرێ ئامادیێ ل باکوورێ پارێزگەها دهۆکێ 13 جهێن شوونواری یێن گرنگ تێدا هەنە یێن کو ڤەدگەرن بۆ سەردەمێن دیرۆکی یێن جودا، و ئاماژە ب هندێ دا کو هەموو ئەڤ جهە ب ئاوایەکى فەرمی هاتینە تۆمارکرن د ناڤ لیستا جهێن شوونواری یێن دیرۆکی یێن پەسەندکری ل عیراقێ، ئەڤ ژی گرنگیا مەزن یا ئەڤی باژێری د نەخشا میراتا نەتەوەیی دا نیشان ددەت.
ئیحسان بۆ ئاژانسا شەفەق نیوز گۆت: کو ناڤێ ئامێديێ د تۆمارێن دیرۆکی دا ژ سەدسالا نەهێ بەری زایینێ هاتیە، دەمێ کو پاشایێ ئاشووری “ئەدەد نیراری” یێ دووێ ب ناڤێ “کوور ئاماد” ئاماژە پێ دایە، ئەڤ ژی نیشان ددەت کا رەهێن شارستانی یێن باژێری چەندی کوور و گرێدایی پاشاتیێن کەڤن یێن کو ميزۆپۆتامیا بڕێڤەبرنە.
ديار ژى كر، باژێرێ ئامێديێ ئێک ژ دیارترین باژێرێن دیرۆکی یە ل عیراقێ، کو ل بلنداهیا 912 مەتران ژ ئاستێ روویێ دەریایێ کەفتیە، و ب جوگرافیا خۆ یا تایبەت ناڤدارە، چونکی ل سەر زنارەکێ مەزن هاتیە ئاڤاکرن و دۆل و چیا دۆردۆرا وێ گرتینە، ئەڤ ژی پاراستنەکا سروشتی و گرنگیەکا ستراتیژی و جوانکاری پێکڤە دایێ.