ناڤه‌ندا نووچه‌یان – سه‌ما
چارشەمبوويێ، 07-05-2025، مەسرور بارزانی، سەرۆکێ حکومەتا هەرێما کوردستانێ، پێشوازی ل سۆمین باگچی بالیۆزێ نوو یێ هندستانێ ل عیراقێ کر.
حکومەتا هەرێما کوردستانێ د ڕاگه‌هاندنه‌كێ دا دياركريه، د کۆمبوونێ دا، کو مادان گۆپال، کونسوڵی گشتيێ هندستانێ ل هەرێما کوردستانێ ئامادەبوو، پێشڤه‌برنا پەیوەندیێن دوولایەنە د بوارێن جۆراوجۆر دا به‌حسكرن.
ئاماژە ب وێ چه‌ندێ دا “سەرۆکێ حکومەتێ سه‌ره‌راى پیرۆزباهيكرنا دەست ب کاربوونا باڵیۆزى، پشته‌ڤانی یا حكومه‌تا هه‌رێما كوردستانێ نیشاندا و دووپاتى ل گرنگییا بهێزكرنا په‌یوه‌ندییێن هه‌رێما كوردستانێ دگه‌ل هندستانێ كر.هەروەسا سەرۆکێ حکومەتێ سوپاسیا کونسوڵێ گشتیيێ هندستانێ کر ب هه‌لكه‌فتا ب داوى هاتنا ئه‌ركێ وى.”
ب گۆڕه‌ى راگه‌هاندنێ، بالیۆزێ هندستانێ ستایشا پرۆسا پێشکەفتن و ئاڤه‌دانییا هەرێما کوردستانێ کر و خواستا وه‌لاتێ خۆ بۆ پێشڤه‌برنا په‌یوه‌ندییان دگه‌ل هه‌رێمێ د بیاڤێ ته‌كنولوجیا زانیارى، دیجیتالكرنا خزمه‌تگوزارییا گشتى و پشته‌ڤانیكرنا چاكسازییێن حكومه‌تا هه‌رێمێ د سیسته‌مێ بانكیدا دووپاتكر.
حکومەتا هەرێما کوردستانێ باسێ وێ يه‌كێ ژى كريه، باڵیۆزێ هندستانێ هەروەسا ئاماژە ب وێ چه‌ندێ دا کو کار بۆ هندێ دکەن گەشتێن ڕاستەوخۆ يێن فڕۆکەڤانی دناڤبه‌را هەولێر و باژێرێن هندستانێ دا هەبت.