ناڤه‌ندا نووچه‌یان – سه‌ما
ئه‌ندامه‌كێ په‌رله‌مانێ عيراقێ ئاماژێ ب وێ چه‌ندێ دده‌ت، هنده‌ك حاله‌تێن غه‌درێ ل ناڤێن ده‌رچوويێن شنگالێ بۆ دامه‌زراندنێ ب شێوێ گرێبه‌ست هاتيه كرن.
مه‌حما خه‌ليل، ئه‌ندامێ په‌رله‌مانێ عيراقێ ل سه‌ر فراكسيۆنا پارتى ديموكراتى كوردستان د نڤيسكاره‌كێ دا راگه‌هاند كو دانه‌يه‌ك بده‌ست سه‌ما كه‌فتيه و تێدا هاتييه: سەربارى ته‌رخانكرنا هه‌زار پله‌يێن دامه‌زراندنێ ب شێوێ گرێبه‌ست بۆ قه‌زا شنگالێ ، لێ هندەک حالەتێن غه‌درێ هەنە کو ل هەمبەر هندەک ناڤان چێبووینە.
گۆتژى: ب هەموو شیانان دێ کارکەین ژبۆ چارەسەرکرنا ڤان کێشەیان ب ڕێکا پەیوەندیا ڕاستەوخۆ دگەل لايه‌نێن په‌يوه‌نديدار ژبۆ دەستەبەرکرنا پشکداریا هەموو د دامەزراندنێ دا و بدەستڤەئینانا دادپەروەریا تەمام بۆ هه‌موو وانه‌بێژان.
ده‌رباره‌ى دەرچوویێن قۆناغا ئامادەیی، مه‌حما خه‌ليل دبێژت: ” دەرچوویێن ئامادەیی ئەوێن کو خزمەتێن مەزن د ناڤ سالێن بوری دا پێشکێشکرین و ناڤێن وان نەهاتینە گونجاندن د ناڤ لیستێن راگەهاندی دا، دوپات دكه‌ين کو كار ل سه‌ر كێشا وان دكه‌ين و ل ده‌مه‌كێ نێزيكدا دێ چاره بت و هه‌موو مافێن وان دێ مسۆگه‌ر بن”.
به‌ريا دو ڕۆژان پارێزگارێ مووسلێ 17هه‌زار پله‌يێن دامه‌زراندنێ راگه‌هاندن، كو وێ رێژه‌يێ هه‌زار پله بۆ قه‌زا شنگالێ هاتينه ته‌رخانكرن.