ناڤه‌ندا نووچه‌یان – سه‌ما
ماوه‌يه‌كه ديپۆرتكرنا په‌نابه‌رێن ئێزدى ل وه‌لاتێ ئه‌لمانيا ده‌ستپێكرييه، چالاكڤانه‌كێ ئێزدى ژى ئه‌گه‌ران ئاشكرا دكه‌ت.
پێنج شه‌مبوويێ،29-5-2025، حه‌سه‌ن قه‌وال، چالاكڤانێ ئێزدى دبياڤێ مافێ مرۆڤى دا بۆ سه‌ما، ڕاگه‌هاند: حكومه‌تا ئه‌لمانيا نوكه وه‌كو تاكه‌كه‌س و هه‌ر كه‌سه‌كێ دى سه‌ره‌ده‌ريێ ل گه‌ڵ په‌نابه‌رێن ئێزدى ژى دكه‌ت.
ئاشكراكر: “حكومه‌ت ئێزديان وه‌ك ئۆلێن چه‌وساندى نابينت و هه‌ر باژێڕه‌ك و فه‌رمانبه‌رێن وان فه‌رمانگه‌هان لدووڤ بريارێن خۆ يێن تايبه‌ت سه‌ره‌ده‌ريێ ل گه‌ڵ ئێزديان دكه‌ن و چ ڕاستى بۆ ديپۆرتكرنا بكۆم يا ئێزديان نينه.”
ده‌رباره‌ى ئه‌گه‌رێن ديپۆرتكرنا په‌نابه‌ران، چالاكڤانێ ئێزدى گۆت: “ژ ئه‌گه‌رێن ڕاستى په‌نابه‌رێن ئێزدى دبن كو بێنه ديپۆرتكرن، هنده‌ك پارێزه‌ر ب دروستاهى زانيارييان ناگه‌هينه دادگه‌هێ و جيێن په‌يوه‌نديدار، خاڵا دى ژى ئه‌وه فه‌رمانبه‌رێن فه‌رمانگه‌هێن وى وه‌لاتى تايبه‌ت يێن پێدانا مافێ په‌نابه‌ريێ وه‌كو خۆ سه‌ره‌ده‌ريێ دكه‌ن، ئه‌ڤێ چه‌ندێ ژى كاريگه‌رى ل سه‌ر مافێ په‌نابه‌ران كريه.”
هه‌ر ژ ده‌ستپێكا ئيساله و تا نوكه ژماره‌كا زۆر يا په‌نابه‌رێن ئێزدى ل سه‌رانسه‌رى ئه‌لمانيا ب تايبه‌ت يێن خه‌ڵكێ هه‌رێما كوردستانێ هاتينه ديپۆرتكرن.
ل سه‌ر ڤى بابه‌تى چالاكڤان و مالێن ئێزدى ل ئه‌لمانيا، چه‌ندين جاران داخوازى ل حكومه‌تا ئه‌لمانيا كرينه ڤێ بڕيارێ ڕاگرن.
ئێزدى ئه‌لمانيا ب وه‌ڵاتێ خۆ يێ دووێ دبينن، پشتى هێرشا ڕێكخراوا داعش يا تيرۆرستى بۆ سه‌ر شنگالێ ل ته‌باخا 2014ێ، زێده‌ترى 100هه‌زار ئێزدى كۆچبه‌رى وى وه‌لاتى بوون.
لدووڤ ئاماران نێزيكى 360 هه‌زار ئێزدى وه‌كو په‌نابه‌ر ل وه‌ڵاتێ ئه‌لمانيا دژين و داب و نه‌ريتێن خۆ يێن جڤاكى و ئۆلى و كه‌لتوورێ خۆ يێ ڕه‌سه‌ن پاراستينه.