ناڤه‌ندا نووچه‌يان – سه‌ما
پەرلەمانتاره‌كێ ئێزدى نڤيسكاره‌كا فه‌رمى ئاراسته‌ى وه‌زيرێ ده‌رڤه‌يێ عيراقێ دكه‌ت و دخوازيت دگەل وەزارەتا دەرڤە یا سووریێ كار بۆ دیتنا چارەنڤیسێ رەڤاندیێن ئێزدی بكه‌ن.
مه‌حما خه‌ليل، ئه‌ندامێ په‌رله‌مانێ عيراقێ ل سه‌ر فراكسيۆنا پارتى ديموكراتى كوردستان ڕاگه‌هاند: ب هه‌زاران ره‌ڤانديێن ئێزدى ب زۆره‌ملێ ل ده‌مێ هێرشا رێكخراوا داعش يا تيرۆرستى بۆ سه‌ر شنگالێ ل ته‌باخا 2014هاتنه بێسه‌روشوونكرن و گه‌له‌ك ژ وان بۆ چه‌ندين ده‌ڤه‌رێن سووريێ هاتنه ڤه‌گوهاستن، له‌ورا مه نڤيساره‌كا فه‌رمى پێشکێشی فوئاد حسێن وەزیرێ دەرڤەیێ عیراقێ کریە کو داخوازیەکا فەرمی پێشکێشێ وەزارەتا دەرڤە یا سووریێ بکه‌ت بۆ لێگەریانا چارەنڤیسێ رەڤاندیێن ئێزدی.
ئاماژه ب وێ چه‌ندێ دا، ئه‌ڤ دۆزه يا مرۆڤى و نيشتيمانى يه و پێدڤى لڤينه‌كا دبلۆماسى هه‌يه، رۆنكر ژى هێشتا ئێزدى ژ ده‌رئه‌نجامێن جينۆسايدا بسه‌رێ واندا هاتى دناڵن.
ل دووڤ ئامارێن نڤیسینگەها ڕزگارکرنا رەڤاندیێن ئێزدی، پتر ژ شەش هه‌زار کەسێن ئێزدی ژ هەردوو ڕەگەزان ژلایێ تيرۆرستێن داعشێ ڤه هاتنە رەڤاندن و بێ سەرو شوونکرن.
ب پشتەڤانیا حکومەتا هەرێما کوردستانێ، هەتا نوکە پتر ژ سێ هه‌زار رەڤاندیێن ئێزدی رزگاربووینە و هێشتا چارەنڤیسێ پتر ژ دوو هه‌زار رەڤاندیان يێ دیار نینە.
نێزيكه يازده ساڵ ده‌رباز ببن ل سه‌ر جينۆسايدا ئێزديان شنگالێ، هێشتا نێزيكى 60 هه‌زار خێزانێن ئاواره‌يێن شنگالێ دناڤ و ژ ده‌رڤه‌ى كه‌مپان ل سنوورێ پارێزگه‌ها دهۆكێ و ئيدارا سه‌ربه‌خۆ يا زاخۆ دژين و چ ڕۆنيه‌ك بۆ ڤه‌گه‌ڕاندنا وان نينه.