ناڤه‌ندا نووچه‌يان – سه‌ما
ئيڕۆ كۆمبوونا به‌رفره‌هـ يا كۆمیتەیا ناڤەندا پارتی دیموكراتی كوردستان ب سەرپەرشتییا سەرۆك مه‌سعود بارزانی ئه‌نجامدا و كۆمبوونێ پێنج ته‌وه‌ر به‌حسكرن.
ئيڕۆ دوو شەمبوويێ 2ـی حوزەیرانا 2025، ب سەرپەرشتیا سەرۆك مه‌سعود بارزانی، كۆمیتەیا ناڤەندی يا پارتی، ب ئامادەبوونا هەڤاڵێن کۆمیتەىا ناڤەندى و بەرپرسێن لقان، كۆمبوونا خۆ يا به‌رفره‌هـ ئەنجام دا.
ئەڤە دەقێ ڕاگەهاندنا کۆمبوونا به‌رفره‌هـ يا کۆمیتەیا ناڤەندی يا پارتی دیموکراتی کوردستانە:
كۆمبوون به چەندەك وەستیانێ بۆ ڕێزگرتن ل گیانێ پاکێ شه‌هیدێن كوردستانێ، سه‌روه‌رێ وان بارزانیێ نه‌مر و كاك ئیدریسێ هه‌ردەم ل بیر ده‌ستپێكر، پاشان چەند پرسەکێن گرنگ شڕۆڤەکرن و گەنگەشە ل دوور کرن.
تەوەرێ ئێکێ/ پەیوەندییا مە دگەل حکومەتا فیدراڵ؛ پارتییا مە د قۆناغا ڕووبڕووبوون و ڕۆخاندنا ڕژێمێ و پاشان د بنیاتنانا عێراقەکا نوو کو تێدا هەمی هەڤوەلاتی هەست ب ئارامییێ بکەن، و ل گورەى دەستووری ب ماف و ئازادییا خوە بگەهن، عێراقەك کو بێ جیاوازییا نەتەوەیى و ئایینى و مەزهەبى بۆ هەمییان بیت ڕۆڵێ کاریگەر هەبوو، سەرکردایەتییا کوردستانێ ب بڕیارا پەرلەمانێ کوردستانێ بەشدارى د دامەزراوەیێن عێراقا نوو دا کر لسەر بنەمایێ هەڤبەش و سازان و هەڤسەنگی (شراکة، توافق، توازن) بڕێڤەبرنا عێراقێ ژ ئالیێ هەموو پێکهاتێن وێ ڤە ل گورەی دەستوورێ هەردەمی یێ عێراقا فیدراڵ و دابینکرنا ژیانەکا ژ هەژی بۆ تەڤایا خەلکێ عێراقێ کو ببیتە جهێ قەرەبووکرنا ئەو هەمی دەردەسەری و وێرانییا ب سەر عێراقێ ب گشتى و کوردستانێ ب تایبەتى دا هاتبوو. ب مخابنی ڤە پشتی دەربازبوونا چەند ساڵێن بسەر ڕوخاندنا ڕژێمێ بەشەك ژ دەسەڵاتدارێن بەغدا ب عەقڵیەتا دوور ژ عەقڵیەتا فیدراڵى و ب ئاراستەیا زڤرینا دەولەتا مەرکەزى و پشتگوهئێخستنا ژ دەستووری و ڕێککەفتنێن کو ل ناڤبەرا لایەنێن سیاسیی ئەنجامداینە بۆ پێکئینانا کابینە و فشار خستنا سەر هەرێمێ ب هەمی شێوەیان و بکارئینانا کارتا مووچە و بودجەیا هەرێما کوردستانێ پێنگاڤان د هاڤێژن، کۆمبوون پەسەند و پاڵپشتیا هەڵویستێ مەکتەبا سیاسیا پارتیا مە کر دەربارەی مووچە و مووچەخۆرێن کوردستانێ، هەروەسا هەلویستێ حزبێن کوردستانی یێن د کۆمبوونا هەڤبەش ل ڕێکەفتی ٣١ى ئەیارا ٢٠٢٥ بلند نرخاند، و پشتی هینگێ ئەو ئاماژا ئەرێنی یا کو هەی ژ لایێ حکومەتا فیدراڵ و دامەزراوەیا قەزائى بۆ چارەسەرکرنا گرفتێ ئەم ژی داکۆکیێ دکەین ل چارەسەرکرنا کێشەیان و ب دوماهی ئینان ب ڤی شێوێ ڕەفتارا نە دادپەروەرانە یا کو کو لگەل ژین وژیارا فەرمانبەر و مووچەخۆرێن کوردستانێ دهێتە کرن.
تەوەرێ دووێ/ پەیوەندیێن مە لگەل هێز و لایەنێن سیاسی یێن کوردستانێ؛ پارتیامە باوەریەکا تەمام ب فرە حزبیێ هەیە و لگەل ئەڤێ ژی ب کارێ هەڤبەش و بەرپرسایەتیێن هەڤبەش هەیە، ژ ئەڤی لایەنیڤە بزاڤێن ڕێکخستنا ناڤ مالا کوردستانامە بەردەوام هەبوویە و مە بزاڤێن ڕژد ژی بۆ دروستکرنا هەڤپەیمانیەکا کوردستانێ بۆ بەشداریکرنا د هەلبژارتنێن داهاتوویی ییێن خولا شەشێ یێن جڤاتا نوونەرێن عێراقێ بۆ ئەوێ چەندێ ل بەغدا وەکو پێکهاتەکا کورد ڕۆلەکێ کاریگەرمە هەبوو، نەک وەك ئەحزاب، بەلێ ب مخابنی ڤە پێشوازی ل بزاڤێن مە نەهاتەکرن و بێ ئەنجام بوو، دوماهی بزاڤا مە ژی بۆ کارێ پێکڤەیی و دروستکرنا هەڤبوچوونیێ بەرامبەر کێشە و ئالنگاریان ئەوبوو کو مە داخاز کر هەمی پارت و لایەنێن کوردستانێ کر ب سۆپاسیڤە بەشێ هەرە زورێ حزب و لایەنان بەرهەڤی کومبوونێ بوون هەڤدەم چەند لایەنان ژی دەستپێشخەری قەبیل نەکر کو ئارمانج ژێ ڕاوێژ و گوهورین بوو دەربارەی بریارێن نەیاسایی یێن وەزارەتا دارایا عێراقێ سەبارەت ب ماف و شایستێن دارایی یێن مۆچەخوران ب تایبەت و خەلکێ هەرێما کوردستانێ ب گشتی، هەژی ئاماژەکرنێ یە کۆمبوونا ناڤبری کۆمبوونەك باش و سەرکەفتی بوو.
تەوەرێ سیێ/ سەرەدان و کۆمبوونێن ڕێزدار سەرۆکێ حکومەتا هەرێما کوردستانێ؛ پشتی گوۆتوبێژان رونکرنێن پێدڤی و ناڤەرۆکا سەرەدانا وی بۆ ویلایەتێن ئێکگرتی یێن ئەمریکا، کۆمبوونا وان ب کارەکێ باش هات زانین و بۆ زێدەتر بهێزکرنا پەیوەندیێن دناڤبەرا هەرێما کوردستانێ و ئەمریکا دا، هەروەسا ڕێکەفتنێن لسەر کێلگەهێن گاز و نەفتێ کو د چار چەڤێ مافێن دەستوری و یاسایی یێن هەرێما کوردستانێ دانە، ب مفا بۆ ڤەژاندنا ئابووریا هەرێما کوردستانێ و عێراقێ هات دانان.
تەوەرێ چارێ/ پرۆسەیا پێکئینانا کابینەیا دەهێ یا حکومەتا هەرێما کوردستانێ؛ لیژنا گوتۆبێژان یا پارتیا مە زانیاری و ڕۆنکرنێن پێدڤی دەربارەی پێنگاڤێن ئەوێ پرۆسەیێ پێشکێشی کۆمبوونێ کرن، بەردەوامیا پێنگاڤێن لیژنا ناڤبری ب مەرەما پێنگاڤێن پێکئینانا کابینەیا دەهێ ب زووترین دەم هاتە زانین.
تەوەرێ پێنجێ/ پرۆسەیا هەلبژارتنێن خولا شەشێ یێن جڤاتا نوینەرێن عێراقێ؛ لیژنا بلندا سەرپەرشتیا پرۆسەیا هەلبژارتنان و هەمی پێنگاڤ و بەرهەڤیێن لیژنان و ئورگانێن پارتیامە سەبارەت ب ئەڤێ پرۆسەیێ هاتنە باس کرن، کۆمبوون ب پلان و بزاڤێن لیژنا ناڤبری ل دووڤ ئەو خشتێ دەمکی یێ هاتییە دیارکرن پەسەند کر.
