ناڤه‌ندا نووچه‌يان – سه‌ما
سەرۆک بارزانى ب هەلکەفتا جەژنا قوربانێ پەیامەک بەلاڤکر و راگەهاند: د دەمەکی دا ئەم نێزیکی ڤێ جەژنا پیرۆزین، دەستهەلاتدارێن بەغدا ب بڕیارەکا نەڕەوا و زالمانە قویت و مووچەیێ خەلکێ هەرێما کوردستانێ بڕی.
پێنج شەمبوويێ، 5ـی حوزەیرانا 2025، سەرۆک بارزانى ب هەلکەفتا هاتنا جەژنا قوربانێ پەیامەک بەلاڤکر و د په‌ياما سەرۆک بارزانیدا هاتييە: ب هەلکەفتا هاتنا جەژنا قوربانێ يا پيرۆز گەرمترین پیرۆزباهییان ئاراستەیی موسڵمانێن کوردستانێ، عیراقێ و جیهانێ دکەم. پیرۆزباهییێ ل خێزانێن سەربلند یێن شەهید، پێشمەرگەهەێن قارەمان و وەلاتییێن خۆشتڤی یێن کوردستانێ دکەم.
سەرۆک بارزانی دپه‌ياما خۆ دا ڕاگەهاندييه: د دەمەکی دا ئەم نێزیکی ڤێ جەژنا پیرۆزین، دەستهەلاتدارێن بەغدا ب بڕیارەکا نەڕەوا و زالمانە قویت و مووچەیێ خەلکێ هەرێما کوردستانێ بڕی . بڕینا مووچە و سیاسەتا برسیکرنا ب کۆمەل یا گەلێ کوردستانێ چ جوداهی ل گەل وان ئەنفال، کیمیابارن و جینۆسایدان نینە یاکو رژێما ژناڤچوویی ل دژی گەلێ کوردستانێ کری. به‌ڵێ ئیرادەیا گەلێ کوردستانێ ژ هەمی ستەمکاری، تاوان و ئەنفالان بهێزتر و بلندترە، ئەوێن دۆژمنکارییا خەلک و هەرێما کوردستانێ دکەن بلا ل دیرۆکێ بزڤرن و تەماشەبکەن. گەلێ كوردستانێ ل هەمبەری هەمی فشار و لێدانان دا یا خۆراگر بوویە و ب سەر نەیار و تاوانباران دا سەرکەفتییە و پەشێمانی هەر بۆ زۆرداران مایە.
سەرۆک بارزانی جەخت ل وێ چه‌ندێ كر، د ڤێ هەلکەفتا پیرۆزدا سوپاسییا خۆراگری، جوامێری و سەربەرزییا تاك ب تاكێ گەلێ خۆ دکەم، ژ خوادیێ مەزن دخوازم خێرو تەناهییێ بۆ كوردستان و عیراقێ و ئاشتی و سەقامگیرییێ بۆ دەڤەرا مە و هەموو جیهانێ بینت.