ناڤه‌ندا نووچه‌يان – سه‌ما
د ڕۆژه‌كا وه‌كی ئیڕۆ دا ل سالا 2017ێ، سه‌رۆك مه‌سعود بارزانی سه‌رپه‌رشتیا كۆمبوونه‌كا ڤه‌كری یا به‌رفره‌هــ یا لایه‌نێن سیاسیێن هه‌رێما كوردستانێ كر و د كۆمبوونێ دا بریار هاته دان ل ڕێككه‌فتی 25ی ئه‌یلولا 2017ێ ڕيفراندۆما سه‌ربه‌خۆیا كوردستانێ بێـته ئه‌نجام دان.
كۆمبوون ل ڕێككه‌فتی 7/6/2017ێ هاته ب ڕێڤه‌برن، پارتێن كوردی ب تێكرایی بریار دان ل سه‌ر پێكئینانا ئه‌نجومه‌نێ باڵا یێ ڕیفراندۆمێ ب سه‌رۆكاتیا سه‌رۆك مه‌سعود بارزانی.
سەرۆك مەسعود بارزانی، ل وی ده‌می ڕاگه‌هاند، ئه‌ڤه بڕیاره‌كا تاكه‌كه‌سی نینه و بڕیارا كه‌سه‌كی و حزبه‌كێ و دوو حزب و سێ حزبان نینه، به‌لكو ئه‌ڤه بڕیارا گه‌لێ كوردستانێ یه.
سەرۆك بارزانی، ل ڕۆژانێن بانگه‌شه‌یا ڕیفراندۆمێ دا دناڤ ئاپورایێن جه‌ماوه‌ری دا ڕاگه‌هاند: ژیانا بن ده‌ستیێ، ژ ده‌ستدانا ئیرادێ و كه‌رامه‌تێ یه، به‌لێ دێ ژی، لێ باجا سه‌ربه‌خۆبوونێ و سه‌ربه‌رستیێ، سه‌رفه‌رازی و شه‌ره‌فه، لێ مومكینه بمری.
ڕیفراندۆما سەربەخۆنا هەرێما كوردستانێ ل 25ی ئەیلوولا 2017ـدا ب سەركەفتیانه ب ڕێڤه‌چوو و 92.7%ی يا خەڵكێ كوردستانێ ب ده‌نگێ بەڵێ بۆ سەربەخۆبوونا كوردستانێ ده‌نگ دا و وه‌كو هه‌رده‌م به‌لگه‌نامه‌یه‌كا مێژووی دێ مینت.
هه‌رچه‌نده ده‌ره‌نجامێ ڕیفراندۆمێ ژ لایێ حكومه‌تا عيراقێ ڤه نه‌هاته قه‌بووڵكرن و ئه‌وی وه‌ڵاتی ده‌ست ب سزادانا هه‌رێما كوردستانێ كر و سزا تا نهۆ ژی درێژی یا هه‌ی، به‌لێ ڕیفراندۆم ب ده‌ستكه‌فته‌كا مێژوویی بۆ كوردان دئێته هژمارتن بۆ ئێكه‌م جار خه‌ڵكێ هه‌رێما كوردستانێ، چاره‌نڤیسێ خۆ ب ده‌نگدانێ ئێكلاكر.
كۆمیسیۆنا باڵا یا هه‌لبژارتنان و و ڕاپرسیا هەرێما كوردستانێ سەرپەرشتیا پرۆسەیا گشتپرسیێ كر و پاشان ئەنجام ژی به‌ڵاڤكرن، ل په‌ی ڕاگه‌هاندنا داویێ یا كۆمیسۆنێ، سێ ملیۆن و 305 هەزار و 925 كەسا پشكداری كر، ژ وێ ژمارێ دوو ملیۆن و 861 هەزار و 473 كەسا ب “بەڵێ” دەنگ دا كو گه‌هته 92.73%ـی یا پشكدارێن پرۆسێ.