ناڤه‌ندا نووچه‌يان – سه‌ما
نوونەرێ تایبەتێ سکرتێرێ گشتیيێ نەتەوەیێن ئێكگرتى ل عيراقێ، ته‌كه‌ز كر، پێدڤيه حکومەتا عيراقێ ب ڕژدی کار بکه‌ت و چارەیەکا ڕیشەیی بۆ کێشەیێن ئێزدیان ببينت و هیڤيان بۆ داهاتوويێ وان ڤه‌گه‌ڕينت.
دوهى ڕۆژا سێ شەمبوويێ 10ـی حوزەیرانا 2025، جڤاتا ئاسایيشا نێڤدەوڵەتی، دەربارەی ڕه‌وشا عيراقێ کۆمبوو.
محەمەد ئه‌لحەسان، نوونەری تایبەتێ سکرتێرێ گشتیيێ نەتەوەیێن ئێكگرتى ل عيراقێ به‌رنياس ب (یۆنامی)، ل کۆمبوونا جڤاتا ئاساييشێ گۆتاره‌ك پێشکێشکر و ئاماژە ب وێ چه‌ندێ دا، عيراقا ئيڕۆ هەمان ئەو عيراقا به‌رى 20ساڵان نينه، ئيڕۆ ئێمناهى و ئاسایيش ل وه‌ڵاتى بەرقرار بوويە سەربارى ئاسته‌نگ و بەربەستان.
سه‌باره‌ت پەیوەندیێن بەغدا و هەولێرێ، نوونەری تایبەتێ سکرتێرێ گشتیيێ نەتەوەیێن ئێكگرتى ل عيراقێ، ئاماژەی ب وێ چه‌ندێ دا، پێدڤيە هه‌ڤبه‌شى و لێکتێگەیشتنه‌كا زێده‌تر دناڤبه‌را واندا هەبت، هەروەسا دڤێت ب گۆڕەی دەستوورى کێشه‌يێن دناڤبه‌را هەولێر و بەغدا بێنه چارەکرن.
هه‌ڤده‌م ئه‌لحەسان به‌حسێ ئێزدیان کر و گۆت: تا نوكه 100 هەزار ئێزدی ژبه‌ر ئاسایینەبوونا ڕه‌وشا ده‌ڤه‌را وان نكارينه ڤه‌گەڕنە سەر ماڵ وحاڵێ خۆ، هێشتا ل کەمپاندا ماينه.
ته‌كه‌زى ل وێ يه‌كێ كر، کو دڤێت حکومەتا عيراقێ ب ڕژدی کار بکه‌ت و له‌زێ بكه‌ت داكو پلانه‌کا نیشتمانی پەسەند بکه‌ت، بۆ هندێ چارەیەکا ڕیشەیی بۆ دۆزا ئێزدیان ببينت و هیڤيان بۆ داهاتوويێ وان ڤه‌گەڕينت.
گۆتژى: زيانه‌كا مه‌زن به‌ر ئێزدیان كه‌فت ل عيراقێ ب شێوەیەکى نكارم پێناسە بکەم، له‌وا داخوازێ ل عيراقێ و هەموو وه‌ڵاتێن دراوسێ دکەم، کو هەموو ڕێکاڕان بگەرنەبەر بۆ هندێ ئێزدیان بپارێزن و ب سەربەستى و سه‌ربلندى ڤه‌گەڕنە سەر ماڵ وحاڵێ خۆ ڤه.