ناڤهندا نووچهيان – سهما
سهرۆكێ بنگههێ لالش ل دهۆكێ دخوازت، ب ڕێكا حكومهتا ههرێما كوردستانێ و حكومهتا فيدراڵ، دهنگێ مهزڵوميهتا ئێزديان بگههينه سهنتهرێن بڕياردانێ ل جيهانێ.
سهعيد جردۆ، سهرۆكێ بنگههێ لالش ل دهۆكێ، بۆ سهما گۆت: ل ڕۆژا 3-8-2025، كو دبته يازدهههمين ساڵڤهگهڕا جينۆسايدا ئێزديان، ئهڤ بيرهوهرى ب ئامادهبوونا پارێزگارێ دهۆكێ ب چهندين برگهيێن جۆراوجۆر ل هۆڵا كۆنفرانسان ل زانكۆيا دهۆكێ دێ ئێته ساخكرن.
سهرۆكێ بنگههێ لالش، دبێژت: ساڵانه بيرهوهرييا جينۆسايدا ئێزديان ژلايێ دهستهيا بڵندا بنگههێ لالش و تايى و نڤيسينگههان ڤه ب چالاكيێن جۆراوجۆر دئێته ل بيرئانين.
ههروهسا دبێژت: داخوازا مه ئهوه ب ڕێكا حكومهتا ههرێما كوردستانێ و حكومهتا فيدراڵ، دهنگێ مهزڵوميهتا ئێزديان بگههته سهنتهرێن بڕياردانێ ل جيهانێ.
سهعيد جردۆ گۆتژى: هيڤيدارين بزاڤهكا مهزن و لهز بێته كرن بۆ ئێكلاكرنا كهيسا جينۆسايدێ ژلايێ دادگهها تاوانێن نيڤدهوڵهتى ڤه، داكو تاوانبار بگههنه سزايێ خۆ و قوربانيێن جينۆسايدێ مافێن خۆ وهرگرن و دادپهروهرى بۆ بێته دابينكرن.
د هێرشا ڕێکخراوا داعش يا تيرۆرستى دا بۆ سەر شنگالێ ل 3ـی تهباخا ساڵا 2014، داعش کوردێن ئێزدی کۆمكوژکرن و شەش هەزار و 417 کەس ڕهڤاندن.
ل ڕۆژێن دهستپێكى يێن هێرشى دا، پترى ههزار وهلاتيێن ئێزدى هاتنه كوشتن و نێزيكى 360ههزار كهس دهربهدهربوون و ئاوارهيى دهڤهرێن ئارام يێن ههرێما كوردستانێ بوون.
پشتى ژناڤچوونا ڕێكخراوا داعش يا تيرۆرستى ل سهر دهستێ هێزێن پێشمهرگهيێ كوردستانێ، زێدهترى 3ههزار رهڤانديێن ئێزدى هاتنه ڕزگاركرن و هێشتا پترى دوو ههزار ڕهڤانديان بێسهروشوونن.
ل سهر ئاستێ نێڤدهوڵهتى چهندين دهسته و وهڵاتان دناڤدا حكومهتا ههرێما كوردستانێ، كهيسا ئێزديان وهكو جينۆسايد ناساندينه، لێ هێشتا حكومهتا عێراقێ دانپێدان ب جينۆسايدێ نهكريه.
پشتى دهربازبوونا يازده ساڵان ل سهر ساڵڤهگهڕا جينۆسايدێ، هێشتا ڕهوشا شنگالێ ئاسايى نهبوويه و پتريا خهڵكێ وێ ئاوارهنه ل كهمپاندا ل سنوورێ پارێزگهها دهۆكێ و ئيدارا سهربهخۆيا زاخۆ، ژبهر نهبوونا ئاراميێ و خزمهتگۆزاريان نكارن دووباره ڤهگهرنه دهڤهرێن خۆ ڤه.