ناڤەندا نووچەیان – سەما
د سالڤهگهرا یازدێ یا جینۆسایدا ئێزدیان دا، ل شنگالێ مير حازم تهحسين بهگ، ميرێ ئێزديان ل كوردستان، عێراق و جيهانێ پهيامهك بهڵاڤكر.
دهقێ پهياما ميرێ ئێزديان:
یازدهههمین بيرهوهرييا جینۆسایدا ئێزدیان ل شنگالێ دهرباز دبت، ههتا نهۆ دناڤ ئازارێن جینۆسایدێ دا د ناڵن، كو ژ ئالیێ ئههریمهنێن سهردهم و تاریاتیێ، ڕێكخراوا تیرۆرستی یا داعش، دژی ئێزدیان كو د بێ تاوان بوون ل شنگالێ ل 3/8/2014ێ ئهنجام دا.
ئیرۆ یازده ساڵ ب سهر جینۆسایدێ دهربازبوون، نێزیكی 3000 كچ ژ سهرجهمێ 6417 كچێن ل دهمێ جینۆسایدێ هاتینه ڕهڤاندن ڕزگاربووینه، خێزانێن رهڤاندیان هێشتا چاڤهرێ كچێن خۆنه و چ نیشانهك نینه.
ل دهمێ دبێژین جینۆساید یا بهردهوامه، مهرهما مه ئهوه ههموو عیراقیێن ئاواره پشتی دهڤهرێن وان ڕزگاربووین ڤهگهڕیانه سهر جهـ و وارێن خۆ، بهلێ هێشتا پتری 20 ههزار خێزانێن ل كهمپێن ئاواران دا ماینه و ناڤچهیێن ڕهسهنێن وان هاتینه پشتگۆهــ هاڤێتن و ژ نهبوونا سهقامگێریێ د ناڵن.
ژ ئهنجامێ ئهوێ جینۆسایدێ ئێزدی ژ وهلاتێ خۆ رهڤین و ژمارا ئهوان یێن كۆچ كرین ل سهرانسهری جیهانێ نێزیكی 200ههزار كهسانه.
بلا ههموو لایهك بزانت كو ل دهمێن و سهرهدانێن مه بۆ حكومهت و پهرلهمانێ وهلاتێن عهرهبی و دهرڤه، ب ڕاستگۆیی و ب دڵسۆزیا تهمام مه ئازارێن گهلێ خۆ گههاندینه، ههروهسا دهستهبهركرنا مافێن مه وهكو ئاینهكێ دێرین و دهستهبهركرنا مافێن جانگۆريان و ژن و زهلامێن ڕهڤاندی و ئاواران، مه پهیوهندی ب نهتهوهيێن ئێگكرتی و جڤاكێ نێڤدهوڵهتی و دهڤهرێ ڤه كرییه، چهند وهلاتان ئهوا بسهرێ ئێزدیان هاتی ب ههموو یاسایێن نێڤدهوڵهتی ب جینۆساید ناسكریه.
ههروهسا دڤێت دان ب ههڵویستێن دلۆڤانێ ههموو ئهوان كهسان بدهین یێن هاریكاریا مه كرین و پشتهڤانیا دۆزا مه كرین و ل ڕۆژا ئێكێ یا كۆمكووژیێ ههتا ئیرۆ د گهل مه سهكنینه.
ههروهسا داخوازێ ژ ههموو لایهنێن عێراقێ و نێڤدهولهتی دكهین دووڤچوونهكا جدی ل چارهنڤیسێ ئێزدیێن ڕهڤاندی بكهن، ههموو بزاڤهكێ بدهنه كاری بۆ ڤهكرنا گۆڕێن بكۆم و لێپرسینێ ل تاوانباران، ب جهــهاتنا دادپهوهریێ و دابینكرنا ئاسایش و سهقامگيريێ بۆ ئێزدیان ل ناڤچهیێن خۆ .داكو بكارن ڤهگهرنه سهر مال و حالێ خۆ و رێز ل وان بێته گرتن.
سلاڤ بۆ جانگۆریان، ئازادی بۆ ژنێن ڕهڤاندی، دادپهروهری بۆ بنهماڵێن قوربانیان، ڤهگهڕیانا سلامهتیێ ب كهرامهت و شهرهف ڤه بۆ ئێزدیێن ئاواره.
میر حازم تەحسین سەعید
میرێ ئێزدیان ل عێراق و جیهانێ و سهرۆكێ جڤاتا رۆحانیا ئێزدیان
3/8/2025