ناڤهندا نووچهيان – سهما
وەزارەتا ناڤخۆ یا حكومەتا هەرێما كوردستانێ، د ڕاگەهاندنەكێ دا ئاماژێ ب وێ چەندێ ددەت، وەزیرا كۆچ و كۆچبەرێن عێراقێ و لێژنەیا بڵند یا ئیغاسێ كار دكەن بۆ هندێ ئاوارەیان ژ ڤەگەرا بۆ سەر زێدێ خۆ بێ بار بکەن و بێی خواندن و ڕاوێژکرن دگەل وان، وان نەچار دکەن کو وەک ئاکنجیێن دەرڤەی زێدێ خۆ بمینن.
ئیڕۆ پێنج شەمبوویێ، 21ـی تەباخا 2025، وەزارەتا ناڤخۆ یا حكومەتا هەرێما كوردستانێ ڕاگەهاندنەك بەڵاڤكر.
د ڕاگەهاندنێ دا هاتییە:
د پێنگاڤەکا نە دەستوری و دژی مافێن سەرەتایی یێن وەلاتیان دا، لیژنا بلندا ئیغاسێ ب سەرپەرشتیا وەزیرێ کۆچ و کۆچبەران، دەست ب گوهورینا دیموگرافیا دەڤەرێن پێکهاتەیێن مەسیحی و ئێزدی کریە، کو خەلکێ وێ یێ ڕەسەن ب نەچاری ل کەمپان دژین.
ژبەر شەڕێ داعش، ژمارەکا زۆرا وەلاتیان، ب تایبەتی ژ پێکهاتەیێن مەسیحی و کوردێن ئێزدی، ب پشتەڤانیا خەلک و حکومەتا هەرێما کوردستانێ و هاریکاریا ئاژانس و ڕێکخراوێن نێڤدەولەتی ل کەمپان ئاکنجی بووینە، و حەتا نوکە ١٨ کەمپێن تایبەت ب ئاواران ڤە ل هەرێما کوردستانێ نە و زێدەتر ژ ٦٠٠ هزار ئاواران نەشیانە ڤەگەرنە سەر زێدێ خۆ و ل هیڤیا ڕەوشەکا ئارامن دا کو ب سلامەتی و سەربلندی ڤەگەرنە سەر جهێن خۆ.
ل جهێ پشتەڤانیکرنا ڤەگەرا ئارەزوومەندانە و پشکداریکرن د زەمینە خوەشکرنێ دا بۆ ڕەوشەکا سەقامگیر، وەزیرێ کۆچ و کۆچبەران و لیژنا بلندا ئیغاسێ کومبوونان دکەن دا کو ئاواران ژ ڤەگەرا بۆ سەر زێدێ خوە بێ بار بکەن و بێی خواندن و ڕاوێژکرن دگەل وان، وان نەچار دکەن کو وەک ئاکنجیێن دەرڤەی زێدێ خۆ بمینن.
نەچارکرنا ئاواران ب تێکەلکرنا ب زۆری د دەڤەرێن دەرڤەی زێدێ خۆ دا، ڕەوشەکا دیموگرافی یا نوو دروست دکەت کو دژی دەقێن دەستوریە و جورەکە ژ جورێن گوهورینا دیموگرافی ب شێوەیەکێ نایاسایی.
ئەڤە لسەر ئاستێ نافخۆیی دژی دەقێن دەستوورێ عیراقێ یە و لسەر ئاستێ نێڤدەولەتی ژی دژی بنەمایێن ڕەفتارا نەتەوێن ئێکگرتی یە دەربارەی کۆچا نافخۆیی و هەروەسا دێ دژ بیتە یاسایا مرۆڤی یا نێڤدەولەتی و ڕێککەفتننامەیێن ژنێڤێ ئەوێن پشتگیریێ ل ڤەگەرا ئاواران و پەنابەران ب شێوەیەکێ خوەبەخشانە و سلامەت و ب ڕێز دکەن، نە ب بریارێن ئیداری یان ب خشتەیێن دەمی یێن گران و نە واقعی. بۆ چارەسەرکرنا ڤێ ڕەوشێ، ئەم ب لەز داخاز دکەین:
ئێکەم: حکومەتا فیدرال وان بریارێن وەزیرێ کۆچ و کۆچبەران ڕابگرت و نەهێنە بجهئینان.
دووەم: نوینەرێ تایبەت یێ نەتەوێن ئێکگرتی و ڕێکخراوێن نێڤدەولەتی دگەل حکومەتا فیدرال کار بکەن بۆ ڕاگرتنا وان بریاران.
سێیەم: داخاز دکەین کو لەز بهێتە کرن د بجهئینانا ڕێککەفتنا شەنگالێ دا، و دیارکرنا قایمقامەکێ نوو، و دەستپێکرنا پرۆسەیا ئاڤەدانکرنەڤێ و ئاسایکرنەڤا بارودۆخی و پێشکێشکرنا خزمەتگوزاریێن بنەڕەتی.
حکومەتا هەرێما کوردستانێ دوپاتیێ لسەر چارەسەریا یاسایی یا کێشەیان دکەت یا گرێدای ب ڤەگەرا خۆبەخشانە و سەربلندانە یا ئاواران ڤە و ب ویست و ئازادیا وان و پشتڕاستبوون ژ نوکە و پاشەرۆژا وان ژ لایێ ئاسایش و خزمەتگۆزاریێن بنەڕەتی و پاراستنا مولک و مالێن وان.
چارەسەریا وێ ڕەوشێ ب خۆ دزین ژ ڕێچارەیێن دروست و مامەلەکرن دگەل ئەگەران ناهێتە کرن و ئەوا د کومبوونێ دا بریار لسەر هاتیە دان، خوە دزینە ژ واقعی و بەرپرسیاریا بنەڕەتی یا چارەسەرکرنا کێشەیان.
وەزارەتا نافخۆ یا حکومەتا هەرێما کوردستانێ