ناڤەندا نووچەیان – سەما
ئیڕۆ چارشەمبوویێ، میرێ ئێزدیان ل كوردستان، عێراق و جیهانێ پێشوازی ل كونسولێ وەڵاتی توركیا ل پارێزگەها مووسلێ كر.
ب گۆڕەی ڕاگەهاندنا جڤاتا ڕۆحانی یا بڵند یا ئێزدیان” ئیڕۆ چارشەمبوویێ 1ـی ئۆكتۆبەرا 2025، میر حازم تەحسین بەگ، میرێ ئێزدیان ل كوردستان، عێراق و جیهانێ پێشوازی ل كونسولێ وەڵاتی توركیا ل پارێزگەها مووسلێ كر.
د دیدارێ دا كو قەوال بەهزاد سلێمان، سەرۆكێ قەوالان و ئەندامێ جڤاتا ڕۆحانی بەرهەڤبوو، میرێ ئێزدیان ئاماژە دا هەڵویستێ كۆمارا توركیا بۆ ڤەكرنا دەرگەهێن خۆ هەمبەری پەنابەرێن ئێزدی یێن ل دەمێ هێرشا داعش بۆ سەر دەڤەرێن ئێزدیان ل 3ی تەباخا 2014 سەرەدانا وی وەلاتی كرین.
میری دووپاتكر، كۆمارا توركیا ژ دوو ئالیان ڤە بۆ مە یا گرنگە، ئێك گرێدانا پەیوەندیێن عێراق و هەرێما كوردستانێ ب توركیا ڤە گرێددەن، یا دووێ هەبوونا دیرۆكی یا ئێزدیان ل وی وەلاتێ كو نێزیكی 360گوندێن ئێزدیان ل وێدەرێ هەنە.
هەروەسا میرێ ئێزدیان رۆنكر، پێدڤیە حكومەتا توركیا گرنگیێ ب مافێن ئێزدیان بدەت و ب تایبەت چەندین نیشانگەه و مەزارگەهێن هەنە، دیسا ئەردەكێ بەرفرەهێ ئێزدیان دەست ب سەر دا هاتیە گرتن پشتی خەڵكێ وان یێ ڕەسەن بجێهێلاین و كۆچبەری وەلاتێن دی بووین، یا پێدڤیە یاسایا بێتە دەركرن بۆ ڤەگەڕاندنا ئەرد و موڵكێ ئێزدیان بۆ خودانێن وان یێن ڕەسەن.
میری بەحس ل پرسگرێكێن هەنوكەیی كر و گۆت: ئاریشا مە مانا ئێزدیانە دكەمپێن ئاوارەبوونێ دا د درێژاهیا یازدە سالێن بووری دا و چارەنڤیسێ پتری 3500ڕەڤاندیان یێ دیار نینە.
ژ لایێ خۆڤە، سەرهاد لافارلی، كونسولێ توركیا خۆشحالیا بۆ سەرەدانا پەرستگەها لالش دەربری و گۆت: ئەوان زانیاریێن تمام هەنە ل سەر ئەوا ب سەرێ ئێزدیان دا هاتی ل شنگالێ ل سەر دەستێ ڕێكخراوا داعش.
ئەو چەندە ژی دیاركر، یا گرنگە ئەوە ئێزدی ب سەرفەرازی ڤەگەڕنە سەر دەڤەرێن خۆڤە و بەرقرابوونا ئێمناهیێ ل شنگالێ دێ هاریكار بت وەبەرهێنان دەستپێبكەت و خزمەتگۆزاریێن سەرەكی بەردەست ببن.
پاشان كونسولی و شاندێ دگەڵدا گەریانەك دناڤ هوندورێ پەرستگەها لالش دا كر، ژبۆ ژنێزیك ڤە دیرۆك و شارستانیەتا پەرستگەهێ بزانن و ئەو داب و نەریت و ڕێورەسمێن ئۆلی یێن دئێنە گێڕان.
