ناڤهندا نووچهيان – سهما
شێخ نایف جاسم قاسم، نوونەرێ مالباتا قوربانیيێن جینۆسایدا ئێزدییان د بەیاننامەیەکێ دا ڕاگەهاند؛ ئهم ب دلگرانى ڤه دووڤچۆنا پێشهات و گوهۆرينێن سووریا و ئەوێ ڕێککەفتنێ دکەین کو ل ناڤبهرا هێزێن سووریا دیموکرات (هەسەدە) و حکومەتا نوو يا سووریا دا هاتييه ئيمزاكرن. ل ڤێدهرێ حکومەتا عێراقێ ئاگههدار دکەین کو پێدڤييه د وى ئاستێ هشيارييێ دا بن و ڕێكارێن توند بۆ پاراستنا سنوورێن ناڤبهرا عێراقێ و سووریێ بگرنە بەر، ب تایبەت ب ڕێيا بهێزکرنا هێزێن پاسەوانێن سنوورى.
ب گۆڕەی زانيارييان، ڕێککەفتنا ناڤبهرا هەردوو لايان بڕگەیا ڕادەستکرنا ئیدارەیا زیندانان و کەمپێن ئاكنجيبوونێ يێن خێزانێن داعشێ تێدایە بۆ حکومەتا نوو يا سووریێ. ئهم هۆشداریێ ددەین ئەڤ پێنگاڤه مەترسییەکا ڕاستەوخۆ و جددییە بۆ سەر ئێمناهييا دهڤهرێن مه، ب تایبەتی بۆ سەر پێکهاتەیێ ئێزدی کو هێشتا برینێن وان ساڕێژ نەبووينه.
داخوازێ ژ خوشک و برایێن ئێزدی و تەڤاهييا هێزێن ئێزدیيان دکەین، بێى ڕەچاڤکرنا ناڤ و ناسنامەيێن سیاسی، بگەهنە لێکتێگەهشتنهكا ههڤبهش. پێدڤييه هەموو ئێك دەنگ بن ل سەر چاوانييا پاراستنا دهڤهرێن مه ل سهر هەر گهفهكێ و ب هشيارى چاڤدێریيا پێشهاتان بکەین.
شەش سالان بهرى نۆكه، حکومەتا عێراقێ، فەرماندەیێ ئۆپەراسیۆنا ههڤبهش و نوونەرایەتييا نەتەوەيێن ئێكگرتى ل سهر مەترسییان ئاگههدار کربوو. ئيڕۆ دوبارە ئەوێ هۆشدارییێ دوپات دکەین: نابت ڕێ ب دوبارهبوونا هێرشێن هۆڤانه يێن داعشێ ل سالا 2014ێ بێنه دان؛ پاراستنا ئێزدییان ئەرکهكێ نیشتمانی و مرۆڤى يه.