ناڤەندا نووچەیان- سەما
ئیرۆ پێنج شەمبوویێ، 22ـی کانوونا دووێ 2026، 80 سال ب سەر دامەزراندنا کۆمارا کوردستانێ ل مەهاباد دەرباز دبن، کۆمارەک هەر چەندە تەمەنێ وێ بتنێ 11 هەیڤ بوون، بەلێ میراتەکێ ب بها بۆ نفشێن ل دووڤ خۆدا هێلان کو تا نۆکە کورد شانازییێ پێ دکەن.
ل رۆژا 22ـی کانوونا دووێ سالا 1946ـی زایینی، ل گۆڕەپانا چارچرا ل مەهاباد و ب پشکدارییا زێدەتر ژ 20 هەزار کەسان ژ نوونەرێن هەموو تەخ و چینێن خەلکێ کوردستانێ، ئێکەمین کۆمارا کوردستان ل مەهاباد ب سەرۆکایەتییا پێشەوا قازی محەمەد هاتە ڕاگەهاندن.
د ماوێ 11 هەیڤێن تەمەنێ خۆدا، کۆمارا کوردستانێ چەندین دەستکەفتێن ستراتیژی بۆ نەتەوەیا کوردان بدەست ڤە ئینان کو تا ئیرۆ وەکو سیمبۆلا نیشتیمانی ماینە.