ناڤهندا نووچهیان – سهما
حەسەن شەریف: کلێپا “بەیتا لالش” رەنگڤەدانا پێکڤەژیانا هزاران سالانە ل کوردستانێ
هونەرمەندێ ناڤدار حەسەن شەریف، د دیدارەکا تایبەت دا ل گەل پێشکێشکارا هونەری “سوزان کەریم” ل کەنالێ سەما، پەردە ژ سەر چەندین راستی و ئاستەنگێن بەرهەمئینانا ڤیدیۆ کلێپا “بەیتا لالش” لادا و تیشک ئێخستە سەر گرنگیا وێ بەرهەمی د مێژوویا هونەری و جڤاکیا کوردستانێ دا.
ئاستەنگ و قۆناغێن کارکرنێ
حەسەن شەریف ئاماژە ب وێ چەندێ کر کو بەرهەمئینانا “بەیتا لالش” کارەکێ سادە نەبوو، بەلکو د چەندین قۆناغێن دژوار را دەرباز بوو، ناڤهاتی گۆت: “ئەم تووشی چەندین ئاستەنگان بووین، ب تایبەت ژ لایێ تێچۆیا دارایی و لایەنێ تەکنیکی ڤە، لێ مە بزاڤ کر کارەکێ ل ئاستێ پیرۆزییا پەرستگەها لالش و دیرۆکا ئێزدیان پێشکێش بکەین.”
پێشوازیەکا گەرم و پەیاما پێکڤەژیانێ
دەربارەی کارڤهدانان، هونەرمەندی دیار کر کو ئەڤ بەرهەمە ل سەر ئاستێ بلند هاتە پێشوازیکرن و گۆت: “سەرۆک بارزانی، جەماوەرێ کوردپەروەر و ب تایبەتی خوشک و برایێن ئێزدی، ب گەرمی پێشوازی ل ڤێ کلێپێ کر، کو ئەڤە بۆ من شانازیەکا مەزن بوو.”
هەروەسا زێدەتر گۆت: “ئەڤ کلێپە تنێ کارەکێ هونەری نینە، بەلکو ڤەرێژ و سەلماندنا پێکڤەژیانا هزاران سالانە د ناڤبەرا پێکهاتێن کوردستانێ دا. ئەم هەموو ب کەڤناریا ئاینێ ئێزدی ڤە د گرێداینە و پاراستنا وی کلتووری ب ئەرکێ خۆ دبینین.”
پڕۆژەیێن داهاتی بۆ شنگالێ یه
د ئاخفتنێن خۆ دا، حەسەن شەریف رێز و تەقدیر بۆ مللەتێ ئێزدی وەک مللەتەکێ ئاشتیخواز نیشان دا و راگەهاند: “ئەگەر کارەکێ دی یێ هونەری یێ ب ڤی شێوەی ئەنجام بدەم، بێگۆمان دێ ل سەر کلتوورێ دەولەمەند و رەسەنێ شنگالێ بت، ژبهركو وێ دهڤهرێ خزمەتەکا مهزن پێشکێشی دەڤەرێ و كوردستانێ كرییه”