سه‌ما
فراکسیۆنا پارتی ل په‌رله‌مانێ عیراقێ، کار دکه‌ت بۆ ده‌رکرنا یاسایه‌کا تایبه‌ت ب دژایه‌تیا گۆتارا ره‌ق و کینێ؛ ب مه‌ره‌ما پاراستنا پێکڤه‌ژیانا ئاشتیانه یا ناڤبه‌را ئایین و نه‌ته‌وه‌یان.
ل رۆژا شه‌مبوويێ، 10/08/2024، مه‌حما خه‌لیل، ئه‌ندامێ فراکسیۆنا پارتیا دیموکراتا کوردستانێ ل په‌رله‌مانێ عیراقێ بۆ کوردستان24 رادگه‌هاند “وه‌کو فراکسیۆنا پارتی، ب رێنیشاندانا سه‌رکردایه‌تیا پارتیا مه، هه‌موو هه‌ولێن خوه دده‌ینه کار دا کو یاسایه‌کا تایبه‌ت ب دژایه‌تیا گۆتارا ره‌ق و کینێ ل په‌رله‌مانى ده‌ربکه‌ین”.
مه‌حما خه‌لیل، رۆنكر ژی کو دخوازن یاسا ب شێوه‌یه‌کى بت، هه‌ر هه‌ڤوه‌لاتیه‌ک ل عیراقێ یان هه‌رێما کوردستانێ، بێرێزی یان سڤکاتی ب پیرۆزیێن ئایین یان نه‌ته‌وه‌یه‌کێ بکه‌ت، رێکارێن یاسایی دگه‌ل بێنه وه‌رگرتن و ب توندترین شێوه سزا بێته دان.
وى ئه‌ندامێ فراکسیۆنا پارتی به‌حسێ وێ يه‌كێ ژی کر، “ل گۆر ده‌ستوورى، عیراق وه‌لاته‌کێ پر نه‌ته‌وه‌یی و ئایینی یه؛ له‌وما پێدڤی یه هه‌موو کار بکه‌ن بۆ پاراستنا پێکڤه‌ژیانا ئاشتیانه یا ناڤبه‌را پێکهاته و نه‌ته‌وه‌یان. گه‌لێ کورد، هه‌لگرێ په‌یاما مرۆڤدۆستی و ئاشتیێ یه و چ جاران زۆرداری ل چ پێکهاته‌یه‌کێ نه‌کریه و هێرش نه‌کریه سه‌ر وان”.
ئه‌ڤه د ده‌مه‌کی دا یه، د ماوێ چه‌ند رۆژێن بوری دا، که‌سایه‌تیه‌کێ ئێزدی ل هه‌رێما کوردستانێ، د ده‌هه‌مین سالڤه‌گه‌را جینۆسایدا دژی ئێزدیان دا، د گۆتاره‌کێ دا وه‌کی ئه‌وا موسلمان دبێژن، “سڤکاتی و بێرێزی” ب ئایینێ ئیسلامێ و پێخه‌مبه‌رێ وان محه‌مه‌د (د.خ.) کریه. پشتره ژی فه‌رمانا گرتنێ بۆ وێ که‌سایه‌تیێ ئێزدی ده‌رچوویه.