ناڤهندا نووچهیان – سهما
ل دووڤ هندێ كو رهوشا ئهولههیێ ل هندهك دهڤهرێن رۆژئاڤایێ كوردستانێ و سووریێ بهرهڤ سهقامگیریێ ڤه دچت، دوو خێزانێن ئێزدی یێن خهلكێ باژێرێ سهرێ كانیێ، پشتی چهندین سالان ژ ئاوارهبوون و دووركهفتنێ، ڤهگهریانه سهر جهـ و وارێن خۆ یێن رهسهن.
ل گۆر چاڤكانیێن ب دهست ناڤهندا نووچهیان یا سهما كهفتین، ئهڤ خێزانه مینا ب هزاران خێزانێن دی یێن كورد و ئێزدی، پشتی هێرش و ئالۆزیێن چهند سالێن بۆری یێن ل سهر باژێرێ سهرێ كانیێ، ناچار ببوون مال و ملكێن خۆ بجهـ بهێلن و پهنایێ ببهنه بهر دهڤهرێن وهكو (عاموودێ، قامشلۆ و تربهسپیێ). ل وێدهرێ د رهوشهكا دژوار و پهریشان دا ژیانا خۆ دهرباز دكرن، ب هیڤیا هندێ كو رۆژهكێ ب سهرفهرازی ڤهگهرنه مالێن خۆ.
د داخۆیانییهكا تایبهت دا بۆ ناڤهندا نووچهیان، جابر جندۆ، چالاكڤانێ ئێزدی ل رۆژئاڤایێ كوردستانێ، راگههاند كو ئهڤ پێنگاڤه دهسپێكهكا باش و ئومێدبهخشه بۆ ڤهگهریانا خهلكی، لێ ئاماژه ب هندێ ژی كر كو پشتی ڤهگهریانێ ئهڤان خێزانان دیار كرییه كو رهوشا مال و ملكێن وان گهلهك یا تێكچوویه و پێتڤی ب نووژهنكرنێ ههیه.
جابر جندۆ ئهو یهك ژی دا دیاركرن كو: “هێشتا گهلهك مال و ملكێن كوردان و ب تایبهت یێن ئێزدیان د بن دهستێ گرووپێن چهكدار دانه و ئهو د بێ بههرن ژ مافێن خۆ یێن سهرهتایی.”
ڤهگهریانا ڤان ههردوو خێزانان بوویه جهێ دلخۆشیێ بۆ خهلكێ دهڤهرێ و وهكو نیشانهكێ دهێته دیتن بۆ ڤهژاندنا ژیانێ ل سهرێ كانیێ، د ڤێ چوارچۆڤهیێ دا، چالاكڤان و رێكخراوێن مافێن مرۆڤی داخواز دكهن كو رێك بهێته خۆشكرن بۆ ههموو ئاوارهیان دا كو بێ ترس و ب ئاشتیانه ڤهگهرنه سهر جهـ و وارێن باب و باپیرێن خۆ.