گومانا تێدا نینه كو گەلەک نەتەوە، ئۆل و گهلێن بەری هزاران سالان ژ دایك بووین، ژ بهر ئهگهرێن جودا وهكو پەتا، برسى بوون، شهڕ و كارهساتان تووشى نەمان و ژناڤچوونێ بووینه، بهلێ دگەل وێ یەکێ كو ڕەهـ و ڕیشالێن ئۆلا ئێزدیان بۆ سهردهمێن ههره كهڤن و دێرین دزڤڕن، هێشتا وهكو وان چیایێن لێ ژ دایك بووى ب سهرفەرازى یا مایى، وهكو وان دارێن ڕەهێن وان د ناخێ ئەردى دا چووين، ژ باھۆزێن بێ ڕەحم و فەرمانێن ل دووڤ ئێك ناترست.
نهینیا زندی مانا ئێزدی و ئێزدیاتیێ یا گرێدایى ئەرد، سروشت، ڕۆژ، ههیڤ، ههوا، وهرزێن سالێ، چاندن، گهشهكرن و ژیانا سروشتى یە.
ئێزدیاتى ژ بهر جینۆساید، فەرمان و وان ئەگەرێن مرۆڤ كۆنترۆلێ ل سهر دكهن ژ ناڤ نهچۆیه، ههر چهندە یێن ب ئێش و دژوار ژى بوون، چونكى ئهو بەری ههموویان ههبووینه، ئهو دگهل ئەرد و ڕۆژێ هاتینه ئافراندن، و هەڤپەیمانی و پەیمانێن ههیین كو دەست ژ ئێزدیاتیێ بەرنهداینه، و د بەرامبەر دا باوەریا ب سروشت و ڕۆژێ و حەژێكرنا ئەردى و مان بۆ وان، دێ میننە ژ كارێن پێشین یێن مرۆڤێ ئێزدى.
ژ وێ ڕۆژا زهردهشتى خیانهت د پەیمانێ دا كرى و دژى وێ ڕێككهفتن و سۆزێ راوهستیا یا دگهل شهمسانیهتا سروشتى ههى، و تۆمهتا وێ یەکێ دایە ئێزدیاتیێ كو پهرستنا خودێیێ شهڕى دكهن یێ وى بخۆ داهێنان بۆ كرى (ئههریمهن) دا كو دەستھەلاتا خۆ ل سەر ئۆلا باب و باپیرێن خۆ بسەپینت، ب ڤێ یەکێ ژى ڕێك بۆ ئۆلێن بانگهشهكار یێن پاشتر خوەش كر.
ژ وى دهمى و تاكو ئیڕۆ، ئۆلا ئێزدى ڕووبڕوویێ ههلمهتێن قڕكرنێ دبت دا كو ڤێ ئۆلێ ل سهر ڕوویێ ئەردى ڕەش بکەن، بهلێ وان پشت گوهـ هاڤێتبوو كو پهیوهندیا ئێزدیان ب ئەردى ڤه، وهكو پهیوهندیا دایكێ یە ب زارۆكێن خۆ یێن بچووك ڤه، ئهوه یا وان دپارێزیت و ناهێلیت ژ ناڤ بچن.
ئێزدیاتى باوەرى و ئیمانا خۆ ب سهر یێن دى دا ناسهپینت، و باوهرى ب شهڕى و بیرۆكا خودێیێ شهڕى د گەردوونى دا نینه، ئهو تشتێ زهردهشتى كرى و ئهو تشتێ ئۆلێن ئهسمانى ژ “ئاڤێستا” وهرگرتى، تنێ بۆ وێ یەکێ بوو كو ل باوهریێن ڕەسەن یێن ب سروشتى ڤه گرێدایى بدەن، و ههروهسا بۆ شهرعیهتدان ب كارێن خۆ یێن نهشیاو كو دژى خودێ و یاسایێن وى نه.
تێبینى: ئهڤ بابهته د گۆڤارا “ئێزدا” دا هاتیه بهلاڤكرن.