ناڤهندا نووچهیان – سهما
پشتی نیڤرۆیا ئیڕۆ چارشەمبوویێ، 25-3-2026، سەرۆک مەسعود بارزانی ل سۆران پشکداری د پرسەیا وان شەش پێشمەرگەیێن سنورێ ئیدارەیا سەربەخۆیا سۆرانێ دا کر، ئەوێن د هێرشا مووشەکی یا سەر بارەگههێ فیرقەیا 7ێ یا دەڤەرا ئێکێ یا هێزێن پێشمەرگەی دا بووینە قوربانی.
سەرۆک بارزانی د پەیامەکێ دا د وێ دەربارەیێ دا ڕاگەهاند:ب توندی ئیدانەیا وێ هێرشێ دکەم کو ب مووشەکێن ئێرانی ل سەر بارەگههێن هێزێن پێشمەرگەی هاتینە ئەنجامدان، ب مخابنی ڤە هژمارەکا پێشمەرگەهێن قههرەمان شەهید بوون و هندەکێن دی ژی بریندار بوون، پرسە و سەرەخۆشیێن خۆ ئاراستەی بنەمالەیێن شەهیدان دکەم و هیڤیا باشبوونێ بۆ برینداران دخوازم.
سەرۆک بارزانی د بەردەوامیا پەیاما خۆ دا گۆت: ئەڤ هێرشە دوژمنکارانە نە و چ هێجهتان ههلناگرن، و چەندین جارە ئەڤ جۆرێن هێرشان ب بێ ڕەچاڤکرنا بنەمایێن هەڤسۆزیێ و یاسایێن نێڤدەولەتی بەرانبەر هەرێما کوردستانێ دهێنە ئەنجامدان.
دیارژی كر: هەرێما کوردستانێ چ جاران نەبوویە پشکەک ژ شەڕێن دەڤەرێ و چ جاران نەبوویە گەف بۆ سەر جیرانێن خۆ، پێشمەرگە گرانبەهاترین سەرمایهیێ گەلێ مەیە.
تێ زانین شەڤا 24-3-2026، بارەگههێن فیرقەیا 7ێ یا سەر ب فەرماندەییا دەڤەرا ئێکێ، د دوو دەمێن جودا دا ب مووشەکان هاتنە ئارمانجکرن، د ئەنجام دا 6 پێشمەرگە شەهید بوون و 30 پێشمەرگەهێن دی ژی بریندار بوون.
