شنگال؛ قەیرانا ئاڤێ سه‌رهلدایه‌ و ب سه‌دان خێزان بێ ئاڤ ماینە

سەما – شنگال

ل ناڤەندا قەزایا شنگالێ و ب تایبەت ل تاخێ “نەورۆز”، کێشەیا کێمئاڤیێ گەهشتییە ئاستەکێ مەترسیدار و د ڤی دەربارەی دا، خەلکێ دەڤەرێ د دیدارەکێ دا بۆ کەنالێ سەما و پەیامنێر شەکرێ مچۆ، گلە و گازندێن خۆ ژ نەبوونا خزمەتگوزارییا ئاڤێ دگه‌هینن.

نێزیکی 300 خێزان بێ ئاڤن

پیر حەجی، کو ئاکنجییەکێ تاخێ نەورۆزە، دیار کر کو پتر ژ 300 خێزانان ل وی تاخی دژین و نێزیکی شەش مەهانە چ دلۆپێن ئاڤێ نەگەهشتینە مالێن وان.

ناڤبری گۆت: “مە سەرەدانا رێڤەبەرییا ئاڤا شنگالێ کرییە، ئه‌و دبێژن بیرا ئاڤێ یا تاخی حشک بوویە. ئەم ب رێیا کەنالێ وە داخوازێ ژ رێڤەبەرییێن ئاڤا شنگال و مووسل دکەین ڤێ کێشێ چارەسەر بکەن، چنكو خەلکێ مە هەژارن و نەچارن ئاڤێ ب پارە بکڕن.”

ژ لایەکێ دی ڤە، عومەر کەریم، زێرەڤانێ بیرا ئاڤا شنگالێ، ئاماژە ب وێ یەکێ کر کو ئەڤە شەش مەهن ئەڤ بیرە ژ کار کەفتییە و سەرەرای داخوازێن وان، هەتا نوکە چو لایەنێن پەیوەندیدار ب هانایێ ڤە نەهاتینە.

رێڤەبەریا ئاڤێ: نزمبوونا ئاستێ ئاڤێ کێشەیەکا گشتییە

ل دۆر ئەگەرێن ڤێ قەیرانێ، مەهدی قاسم، رێڤەبەرێ ئاڤا شنگالێ بۆ کەنالێ سەما راگەهاند: “ئەڤە کێشەیەکا گشتییە ل سەرانسەری شنگالێ، چنکو ئاستێ ئاڤا ژێر عەردی گەلەک نزم بوویە و ئاڤا بیران حشک بوویە.

 ناڤبری زێدەتر گۆت: “مە سەرەدانا لایەنێن پەیوەندیدار ل مووسل و بەغدا کرییە و سۆز داینە کێشێ چارەسەر بکەن، مە داخوازا کولانا 13 بیرێن نوو کرییە و ئەم ل هیڤیا جێبەجێکرنێ نە.”

ئامارێن بیرێن ئاڤێ ل شنگالێ

ل گۆرەی داتایێن رێڤەبەرییا ئاڤێ:

• کۆم گشتییا بیران: 23 بیر.

• بیرێن حشکبوویی: 8 بیر.

• بیرێن بەردەوام: تنێ 15 بیر کار دکەن.

ئەڤ قەیرانە بوویە ئەگەرێ وێ یەکێ کو بارگرانییەکا مەزن بکەڤیتە سەر ملێ وەلاتییان، ب تایبەت د کڕینا ئاڤا تەنکەران دا کو تێچوویەکێ زێدە ل سەر خێزانان دروست دکەت.