سەما / شنگال
قوتابیێن ئامادەییا شنگال یا ئێڤاران، د بەیاننامەیەکا فەرمی دا کو ئاراستەی رێڤەبەرییا پەروەردا نەینەوا کرینە، داخواز دکەن سەنتەرێن وان یێن ئەزموونان (الامتحان) ژ باژێرێ مووسل بهێنە ڤەگوهاستن بۆ ناڤ سەنتەرێ قەزایا شنگالێ.
د بەیاننامێ دا هاتیە، کو دوورییا رێکا د ناڤبەرا شنگال و مووسل دا بارەکێ گران ل سەر ملێن قوتابیان چێکریە، رۆژانە ئهڤ رێکا درێژ دبتە ئەگەرێ ماندیبونهكا زێدە بەری چۆنا ناڤ هۆلێن ئەزموونان، کو ب شێوازەکێ ئێكیهر کارتێکرنێ ل سەر ئاست و هێزا خواندنێ یا قوتابیان دکەت.
قوتابیان ئاماژە ب بارودۆخێ ئابووری یێ دژوار یێ دەڤەرێ کر و دیار کرن کو بههایێ هاتن و چوونێ و مانت وان ل موسل بارەکێ دی یێ دارایی ل سهر ملێن قوتابییان پهیداكریه، و ئەڤ چەندە رەنگە ببتە ئەگەر کو هندەک قوتابی نكارن پشکداریێ د ئەزموونان دا بکەن.
د پشکەکا دی یا بەیاننامێ دا هاتیە: “ئەم داخوازا دادپەروەریێ دکەین، هەروەک چەوا قوتابیێن خواندنا سپێدههیان ل سەنتەرێن خۆ ئهزموونان دكهن، پێدڤییە ژینگەهەکا یەکسان بۆ مە ژی بهێتە دابینکرن، چونکی ئەم هەموو د بن هەمان پیڤەرێن ئەزموونان دانە.”
ل دوماهییا بهیانناما خۆ دا، قوتابیێن ئامادەییا شنگال یا ئێڤاران هیڤی خواست کو رێڤەبەرییا پەروەردا نەینەوا ڤێ داخوازیا وان ب چاڤەکێ مرۆڤایەتی و پەروەردەیی وەربگرت و کار بکەت بۆ ڤەگوهاستنا سەنتەرێن ئەزموونان بۆ ناڤ قەزایا شنگال، ژ پێخەمەت پاراستنا پاشەڕۆژا زانستی یا قوتابیان د ڤان بارودۆخێن دژوار دا.
