سهما – ههولێر
مەسرور بارزانی، سەرۆکوەزیرێن هەرێما کوردستانێ د كۆنگرهیهكێ رۆژنامهڤانی دا داخوازێ ژ بەغدا دکەت رێگریێ ل “هێرشێن گروپێن ل یاسایێ دەرکەفتین” بکەت. دبێژتژی، “هەرێما کوردستانێ د گەل وێ یەکێ دایە نەفت بهێتە هنارتن بۆ ژ دهرڤه و چ رێگری ژی نینە”.
سەرۆکوەزیرێن هەرێما کوردستانێ ل دۆر مووچەی، هێرشێن درۆنی و مووشەکی، هناردەکرنا نەفتێ، بارودۆخێ ناڤخۆ و دەڤەرێ ئاخفت.
مەسرور بارزانی گۆت، “ب مخابنی ڤه ب موشەک و درۆنان هێرش ل سەر کوردستانێ هاتیه كرن و ئەڤ یەکە چو ببانوویان هەلناگرت، هەرێما کوردستانێ نە پشکەکە ژ ڤێ شەڕێ و داخوازێ ژ حکومەتا فیدرالی دکەین رێگریێ ل وان هێرشان بکەت”.
سەرۆکوەزیرێن هەرێما کوردستانێ ڕاگەهاند، “حکومەتا فیدرالی بەرپرسە ژ ڕاگرتنا هێرشێن گروپێن ل یاسایێ دەرکەفتی، ژبەرکو پشکەک ژ وان مووچەخۆرێن حکومەتا عێراقێ نە”.
هەروەسا سوپاسیا هەڤپەیمانان کر بۆ ئێخستنا مووشەک و درۆنان ب تایبەت ل هەولێرێ و گۆت: “رۆلەکێ گەلەک باش هەبوویە”.
مەسرور بارزانی ل دۆر هناردەکرنا نەفتێ ب رێکا بۆریا نەفتا هەرێما کوردستانێ گۆت، “ئەم وەک هەرێما کوردستانێ ژ هەموو کەسێ پتر خەمخۆرێن ئابوورێ هەرێما کوردستانێ و مووچە و ژیارا خەلکی نە، نۆکە ژی دوپات دکەین کو هەرێما کوردستانێ د گەل وێ یەکێ دایە نەفت بهێتە هناردەکرن”.
ل دۆر نیگەرانیێن بەغدا ژی، بەحسێ وێ یەکێ کر، “هەرێما کوردستانێ نە رێگرە، بتنێ داخوازا وێ یەکێ کریە کو گەرەنتی هەبیت و بكارن ژ کێلگەهێن خۆ ژی نەفتێ هناردە بکەین”.
گۆتژی، پێدڤیە بەغدا مافێن خەلکێ هەرێما کوردستانێ بدەت و وێ ئابلوقەیا هەی لادەت.