ناڤەندا نووچەیان – سەما
ب هەلکەفتا 35 سالیا سالڤەگەڕا سەرهەلدانا خەلکێ رانیە، مەکتەبا سیاسی یا پارتی دیموکراتی کوردستان تەکەزێ ل سەر ئێکڕێزیا ناڤ مالا کوردستانی دکەتەڤە و ڕادگەهینت: ئەرکێ هەموو لایەکی دزانین د پرسێن ستراتیژیدا هەڤئاڕاستە و هەڤگوتار بین و بەرژەوەندیێن بلند یێن خەلکێ کوردستانێ ل پێش هەر تشتەکێ دی بێنە دانان.
ئیرۆ چارشەمبوویێ، 4ـی ئادارا 2026، مەکتەبا سیاسی یا پارتی دیموکراتی کوردستان، ب هەلکەفتا سالڤەگەرا سەرهەلدانا خەلکێ رانیە پەیامەک بەلاڤ کر و ئاماژێ ب وێ چەندێ دکەت، ئاڤاکرن و پلان و کارنامە و ب هێزکرنا وی قەوارێ دەستووری یێ هەرێمێ ب ساناهی نەبوو، بەلکو تا ئیرۆ ژی رووبروویێ کۆمەکا ئاستەنگ و ئاریشەیێن سیاسی، ئابۆرری و ئەمنی دبتەڤە، بەلێ ب باوەری و دلسۆزیا گەل و هێزێن نشتیمانی و قوربانیدانا پێشمەرگەیێن قارەمان، وەلاتێ مە هەمیشە یێ ئارام و سەقامگیر مایە.
دەقێ پەیاما مەکتەبا سیاسی یا پارتی دیموکراتی کوردستان:
لاپەرێن گەش یێن بزاڤا رزگاریخوازییا گەلێ مە ب قوربانیدان و خۆڕاگری و ئیرادا رۆلێن دلسۆز هاتینە نەخشاندن، هێزەک کو هەمیشە سەنگەرێ دژی ستەم و زۆرداریێ بوو و سەلماند کو هێزا گەلی تاکە هێزا راستەقینە یا شۆرەش و بەرخۆدانێیە.
ئێک ژ وان ئەلقەیێن چارەنڤیسساز یێن خەباتا بەردەوام و نەبڕی، سەرهەلدانا شکۆدارا (5ی ئادارا 1991) بوو، کو ل باژێرێ رانیەیا دەرگەهێ راپەڕینێ دەستپێکر و کڵپە و ئاگرێ راپەڕینێ دانەمریا تا ئازادکرنا کەرکوکا دڵێ کوردستانێ.
راپەڕین راوەستان بوو دژی ستەم و سەرکوتکرنا رژێما بەعس و دارودەستێن وێ، و بوو ب پێنگاڤەکا مەزن و هیوابەخش بۆ ئاڤاکرنا ئەزموونەکا نوو یا حوکمڕانیا کوردی، کو د هەلبژارتنێن پەرلەمانی و ئاڤاکرنا حکومەتا هەرێما کوردستانێ ل سالا 1992ێ دا خۆ نیشان دا.
ئاڤاکرن و پلان و کارنامە و ب هێزکرنا وی قەوارێ دەستووری یێ هەرێمێ ب ساناهی نەبوو، بەلکو تا ئەڤرۆ ژی روو ب روویێ کۆمەلەکا ئاستەنگ و ئاریشەیێن سیاسی، ئابووری و ئەمنی دبیتەڤە، بەلێ ب باوەری و دلسۆزیا گەل و هێزێن نشتیمانی و قوربانیدانا پێشمەرگەیێن قارەمان، وەلاتێ مە هەمیشە یێ ئارام و سەقامگیر مایە.